DIS Saterdagaand en tyd vir jolyt.

In Langstraat, Kaapstad, wemel die sypaadjies van jong mense wat op pad is na die nagklubs. In Newtown in Johannesburg klink harde musiek uit partytjieplekke op en in Floridaweg, Durban, maak die jongklomp, uitgevat in die jongste modes, hulle reg om die nag om te kuier. En oral vloei die drank vrylik vir almal wat 18 jaar en ouer is . . .

Maar dit sal dalk iets van die verlede wees as die wetmakers hul sin kan kry. As Bathabile Dlamini, minister van maatskaplike ontwikkeling, se nuwe wetsontwerp van krag word, sal jong mense nie drank mag koop of in die openbaar mag drink voor hulle 21 is nie. Dit is alles ter wille van veilige en gesonde gemeenskappe, sê die minister.

En natuurlik het baie luide stemme intussen al hieroor opgegaan. ‘‘Wat ’n pretbederwer!’’ sê Zachray Ferris, ’n student aan die Universiteit van die Wes-Kaap. ‘‘Alkohol is deel van ons leefstyl. Ons het die vryheid om volwassenes te wees; hoekom kan ons dit nie geniet nie?’’

Die vraag is inderdaad of 18-jariges werklik verbied kan word om alkohol te koop en te gebruik, aangesien hulle deesdae wetlik op hierdie ouderdom as volwassenes beskou word – en ook al mag stem, motor bestuur en trou.

Sal wetgewing soos dié geweldpleging deur jeugdiges help hokslaan en die aantal ongelukke weens dronkbestuur op ons paaie verminder soos die minister hoop?

In Suid-Afrika sterf dubbel soveel mense in padongelukke as die gemiddelde syfer wêreldwyd en ’n geraamde 60 persent van alle padsterftes word aan dronkbestuur toegeskryf. Ook misdade van allerlei aard word met drank- en dwelmmisbruik verbind.

Maar sal die voorgestelde wet hierdie sosiale euwels help uitroei of sal dit bloot 18-jariges drie jaar langer laat wag voor hulle hulle aan drank kan vergryp en hulle wangedra? En sal daardie drie jaar werklik op die lang duur ’n verskil in hul lewe en in hul gemeenskappe maak?

Lees die volledige artikel in die Huisgenoot van 24 Maart 2011