[caption id="attachment_136203" align="alignnone" width="600"]Mandoza (Foto: Martin de Kock) Mandoza (Foto: Martin de Kock)[/caption]

Plaveiselkarsinoom, ’n soort velkanker, is in Junie verlede jaar by Mandoza gediagnoseer nadat hy pyn ervaar en uit sy regteroog gebloei het.

Maar net toe hy dink hy het dit geklop, het nog ’n skok die man agter die treffer Nkalakatha getref – die kanker is terug, dié keer in sy brein.

Lees ook: Hoe kan jy die moeilike pad met chemoterapie makliker maak?

“Hy het sowat twee weke terug gekla van hoofyn en probleme met sy oog, maar nie dieselfde oog as voorheen nie. Ons het besluit om na ’n oogkundige te gaan,” vertel sy vrou, Mpho.

“Dit het gevoel asof die geskiedenis hom herhaal, want dit het net soos laas geklink.”

Die oogkundige kon nie fout vind nie, maar het gevra dat hulle ’n MRI-skandering laat doen om te kyk of daar iets ernstigs skort. En dis hoe die paartjie tot hul skok uitgevind het die kanker is terug, maar dié keer het dit die brein aangetas en in ’n gewas ontwikkel.

[caption id="attachment_136202" align="alignnone" width="600"]Mandoza en sy vrou, Mpho. Foto: Martin de Kock Mandoza en sy vrou, Mpho. Foto: Martin de Kock[/caption]

“Dit is ’n ernstige toestand, maar tans nie kritiek nie, so my man is tuis en net soos voorheen glo ons dat ons dit hierdeur sal maak,” sê Mpho.

Hoewel Mandoza nog sterk voel en kan stap, praat, eet en skryf, voel hy by tye verward. Mpho het almal gevra om die egpaar in hul gebede te hou.

Lees ook: Huisgenoot-joernalis vertel: Só red jy ’n lewe binne net 90 minute

“Al die dinge eis in ’n stadium hul tol, maar ek is eintlik sterker. My geloof in God het my deur soveel dinge gedra en dit sal ons hierdeur ook kry. Ons het besluit om ’n persverklaring uit te reik en dit in die openbaar aan te kondig omdat ons voel hoe meer gebede daar vir ons kan wees, hoe beter.”

Mandoza gaan steeds Saterdag en op 24 September in die Orlando-stadion in Orlando, Soweto, optree.

– Shanaaz Prince