’n Brit ly aan ’n siekte wat koolhidrate in alkohol omsit.

Voor die 34-jarige man verlede jaar gediagnoseer is, het sy geliefdes vermoed hy het ’n drankprobleem.

“Dit was grieselrig. Ek sou ’n klompie koolhidrate eet en ewe skielik was ek verspot en vulgêr. Ek het ’n jaar lank elke dag opgegooi wanneer ek wakkerword.

“Partykeer sou dit oor ’n paar dae aankom, maar soms was dit net kaplaks! Ek is dronk,” het hy aan die BBC gesê.

Sy vrou, Karen Daw, het vermoed hy gaar stilletjies drank op en dat dit sy lukrake oomblikke van beskonkenheid sou kon verklaar.

“Ons sou byvoorbeeld sit en televisie kyk … en teen die einde van die aand sou hy deurmekaar begin raak en hy sou begin sleeptong praat. Bowendien sou sy asem na alkohol ruik.

“Ek het die hele huis gefynkam op soek na alkohol; oral waar ek kon dink hy miskien ’n botteltjie of flessie sou kon wegsteek. Die pynlike deel hiervan was om aan hom te twyfel.

“Dit het my net meer vasbeslote gemaak om te probeer uitvind wat hy makeer,” het sy aan ABC News gesê.

Ná die diagnose hou Nick sy siekte onder beheer deur middel van ’n dieet wat laag is in koolhidrate, en hy neem ook antifungusmedikasie. Alhoewel hy nog een of twee aanvalle per maand kry, is sy toestand aansienlik beter as vantevore.

Bronne: bbc.co.uk, mirror.co.uk, metro.co.uk