Erik Johnson van Long Island, New York, sê hy het gebuk om sleutels op te tel toe hy ’n plofgeluid hoor en sy broek daarna begin brand.

Hy vertel: “My been het begin brand. Ek moes my langbroek uitpluk. ’n Paar mense het gesê hulle kon my lyf ruik brand. Dit het gevoel soos wanneer jy ’n bul brandmerk.”

Hy is 10 dae lank by ’n brandeenheid behandel nadat die selfoon deur sy broek gesmelt en aan sy vel gekleef het. Verpleegsters moet nou twee keer per dag die verbande op die groot wond aan sy bobeen omruil.

’n Selfoon kan weens ’n beskadigde stroombaanpaneel ontplof of as die verkeerde laaier gebruik word. Erik sê dit was nie met hom die geval nie en hy dagvaar Apple nou.

Apple het nog nie op die bewerings gereageer nie.

Bronne: WABC TV New York, Daily Mirror, CNET,