’n Emmerlys (“bucket list” in Engels) verwys na al die avonture wat iemand nog wil ervaar voor hulle die emmer skop.

Die veldtog My Ultimate Bucket List het klante gevra om met voorstelle vorendag te kom. Die bestes wen pryse, onder meer vlugte.

’n Verklaring van Malaysia Airlines het nie gesê wat die veldtog se nuwe naam is nie. Dit word tot einde vanjaar in Australië en Nieu-Seeland aangebied.

Die lugredery het Donderdag gesê hulle het die titel onttrek omdat dit “in hierdie stadium onvanpas is.

“Die lugredery het begrip vir en respekteer die publiek se mening en het hoegenaamd nie bedoel om enigeen aanstoot te gee nie,” het hulle gesê.

’n Vliegtuig van die Maleisiese lugredery het op 8 Maart onderweg na Beijing met 239 mense aan boord vermis geraak; dis steeds soek. In Julie is ’n vliegtuig van die lugredery oor die Oekraïne afgeskiet; al 298 passasiers het omgekom.

Die lugredery het voor die twee rampe ’n goeie veiligheidsrekord gehad en is voorheen met hoëgehaltediens vereenselwig. Maar die twee rampe, en die lugdiens se hantering van veral die eerste een, het hul handelsmerk baie skade berokken.

Die lugredery se meerderheidsaandeelhouer, die staatsbeleggingsmaatskappy Khazanah, het verlede week aangekondig hulle gaan 6 000 werkers by Malaysia Airlines afdank as deel van hervormings van sowat R20 biljoen.

Bron: Sapa-AP /mm