’n Man wat daarvan beskuldig word dat hy drie van sy familielede met ’n byl doodgekap en nog twee probeer vermoor het, wil skuld beken, het die Vereeniging-streekhof Dinsdag gehoor.

“Mag ek nou skuldig pleit?” het die man gevra, kort ná hy deur die hof ingelig is dat hy vir waarneming na ’n psigiatriese inrigting gestuur sal word.

Hy het ’n blou denim, ’n grys trui en rooi-en-swart seilskoene aangehad.

Die 25-jarige man word daarvan beskuldig dat hy sy 60-jarige ouma en twee vroue van sy familie, onderskeidelik 26 en 28 jaar oud, met ’n byl doodgekap het.

“Die twee vroue het op die toneel gesterf. Die ouma het op pad na die hospitaal aan haar beserings beswyk,” het kapt. Disebo Selepe gesê.

Twee van die man se nefies, onderskeidelik 17 en 18 jaar oud, is beseer en is in ’n kritieke toestand na ’n nabygeleë hospitaal geneem.

Die man het ook ‘n sesjarige familielid aangeval, maar sy is nie beseer nie.

Hy het ná die aanval gevlug en is later in Tembisa in hegtenis geneem.

Dit is nog onseker wat die motief vir die aanval was.

Die staat het aangevoer die man het skuld op die moorde beken. Die staat sal borgtog teenstaan.

Talle plaaslike inwoners en sommige van die man se familielede het Dinsdag die hof volgepak.

Die landdros het twee familielede na vore geroep en hulle uitgevra oor die man se geestesgesondheid.

“Hy het geen geestelike stoornis onder lede nie,” het hulle aan die landdros gesê.

Die saak is tot 21 Januarie uitgestel sodat die man regshulp kan inwin.

Bronne: Sapa, Beeld.com