Kayla Oxenham (23) se sewejarige dogter het aan die polisie vertel haar ma het gesê sy en haar vyfjarige sussie kan roomys kry as sy hulle met ’n warm stok kan brand om hulle beter uit te ken.

Sy het ook vertel hoe haar ma op ’n vorige geleentheid ook haar sussie aan die hare gegryp en haar kop herhaaldelik teen ’n muur gestamp het om haar te straf nadat sy hul kat in die badkamer toegesluit het.

Personeel by die sussies se dagsorgsentrum het glo by die owerheid gaan kla nadat hulle merke aan die kinders gewaar het. Mediese verslae het later bevestig dat hul beserings ooreenstem met dié van brandwonde.

Die ma, ’n mediese assistent, het aanvanklik ontken sy het haar kinders mishandel. Sy het ook geweier om met die polisie te praat. Sy is in hegtenis geneem, maar is later op borgtog vrygelaat. Haar kinders is uit haar sorg verwyder, sê maatskaplike werkers.

Hulle word nou deur die jongste kind se pa versorg.

- Janine Nel

BRONNE: DAILYMAIL.CO.UK, BUZZFEED.COM