Die talentvolle Kapenaar Loki Rothman het van kitaarspeel ’n kuns gemaak. Boonop is dié Sama-benoemde kunstenaar se YouTube-kanaal propvol van sy kreatiewe vertolkings van internasionale sterre se musiek, insluitend Sorry deur Justin Bieber en Uptown Funk deur Bruno Mars en Mark Ronson.

[caption id="attachment_124105" align="alignnone" width="600"]Pierre Greeff (links) en Loki Rothman het saam Amanda Strydom se My Kamer opgeneem. Foto: Verskaf Pierre Greeff (links) en Loki Rothman het saam Amanda Strydom se My Kamer opgeneem. Foto: Verskaf[/caption]

Loki deel sy gewilde kitaarinterpretasies onder die hutswoord #OneManBand en doen dié belofte gewis gestand; hy kan ’n rits ander instrumente ook bespeel.

Op The Way Back, sy debuutalbum wat verlede jaar verskyn het, sing hy trouens nie net nie; hy bespeel ook al die instrumente.

“Ek het myself geleer om te sing terwyl ek op ’n akoestiese kitaar gelyk die akkoorde, perkussie en baskitaar speel. Mense het gunstig gereageer op my weergawe van Uptown Funk, toe besluit ek om nog te maak.”

Hy sê ook: “Ek hou daarvan om die video’s interessant te maak. Die kykers moenie weet wat om te verwag nie.”

Omdat hy nog altyd van Pierre Greeff, hoofsanger van Die Heuwels Fantasties, se stem gehou het, het Loki hom gevra om saam ’n duet op te neem. Tot sy verbasing het dié gesoute sanger dadelik ingestem.

Die volgende groot uitdaging was om te besluit vir watter bekende snit hulle ’n nuwe baadjie gaan aantrek. “Ek wou nog altyd ’n Afrikaanse lied uitgereik het,” sê Loki.

Hy is Afrikaanssprekend, maar is nie gemaklik daarmee om in die taal te sing nie. “My album was ook Engels. Niemand het my al gehoor Afrikaans sing nie.”

Pierre het hom dadelik gerusgestel. “Hy sê toe hy wou lankal iets doen met My Kamer deur Amanda Strydom en Stef Bos.” Dinge het dadelik in plek geval en die verwerking van die musiek kon begin.

Lees ook: Jacques Terre’Blanche raak nostalgies en sing Lucas Maree se Droomvrou vir sy oorlede pa

“Toe Pierre die liedjie vir my stuur, het ek dadelik gelet op hoe dramaties dit was; ’n klomp instrumente was betrokke. Dis werk natuurlik perfek vir die lied,” sê Loki.

“Maar vir my is die woorde so mooi, ek wou dit na vore bring.” Om dit reg te kry, het hy Amanda se oorspronklike lied aangepas vir net twee stemme, een kitaar “en miskien ’n bietjie perkussie” hier en daar.

En hoe het dit gevoel om vir die eerste keer in Afrikaans te sing? “Vreemd!” sê Loki.

Maar, beloof hy, nog vele Afrikaanse liedjies is op pad.

Ander stories op Huisgenoot.com:

Kurator van Huisgenoot-uitstalling met Kanna vereer in ons 100ste bestaansjaar

Kyk: Groot opwinding in dié geliefde Pasella-aanbieder se huishouding

Hierdie wakkerweeswenke kan keer dat JY gekaap word

Kyk: Ouma Trys se histeriese kennismaking met Face Swap

Kyk: Bobby van Jaarsveld ontdek Face Swap en die resultaat is skreeusnaaks!