Martin Duram van die deelstaat Michigan in Amerika is in Mei 2015 in sy Sand Lake-huis vermoor. Sy vrou, Glenna, is ook in die kop geskiet, maar het die aanval oorleef.

Die polisie krap steeds kop oor wat presies met Martin gebeur het. Geen verdagtes is tot dusver in hegtenis geneem nie.

Die enigste getuie tot die moord, is glo Martin se vuilbek African grey, Bud. Martin se eksvrou hou vol die papegaai het die hele voorval sien gebeur. Nou kan Bud nie ophou om die moord te herleef nie. Hy mompel gereeld dieselfde woorde oor en oor: “Moenie f***** skiet nie!”

Martin se ouers is vas oortuig die owerheid moet Bud se heftige reaksie op die moord as getuienis aanvaar. Hulle het selfs ’n video-opname van hoe Bud die woorde oor en oor sê, aan die polisie oorhandig.

Martin se eerste vrou, wie se naam nie bekend is nie, sien deesdae na die 20-jarige papegaai om wat sy en Martin saam versorg het toe hulle nog getroud was.

Die 45-jarige Martin se familie is oortuig daarvan Glenna het hom geskiet en dat sy daarna die geweer op haarself gerig, maar nie daarin geslaag om haar eie lewe te neem nie.

Die vermoede is nou dat Bud die moord voor hom sien afspeel het en dat hy Martin se laaste woorde herhaal. Glenna het intussen van haar kopwond herstel, maar hou vol sy kan niks van die dag se gebeure onthou nie.

Die polisie het bevestig Glenna is wel ’n verdagte aangesien drie selfdoodbriefies wat sy na bewering geskryf het in die huis gevind is – een briefie vir haar eksman en twee aan haar kinders.

Sy is egter tot dusver nog nie formeel van die moord op Martin aangekla nie.

Martin se ouers is mismoedig oor die stadige vordering wat die polisie in die saak maak. Hulle weet Bud kan nooit in die ooggetuiebank staan nie, maar hoop steeds sy herhaling van “Martin se laaste woorde”, die skuldige gouer eerder as later sal help vastrek.

Bronne: Daily Mail; The Lad Bible; The Independent

Lees ook op Huisgenoot.com:

Skrywer van die inspirerende Vir die Siel-reeks, Susan Coetzer, gee raad vir dié week

Suid-Afrikaners deel hul gunsteling-Afrikaanse woord

Gaan so lag-lag terug werk toe ná kraamverlof

Hoe goed ken jy jou 1933-vertaling van Die Bybel?