’n Chinese dief het met moeite 11 bladsye telefoonnommers van ’n gesteelde iPhone uitgeskryf en dit vir die eienaar gestuur.

Die sakkeroller het vermoedelik die Apple-foon by Zou Bin gesteel toe hulle ’n taxi deel, het die nuusagentskap Xinhua gesê.

Zou het byna 1 000 kontaknommers op die selfoon gehad en sonder ’n rugsteun-kopie, soos miljoene ander mense wêreldwyd, was hy meer besorg oor die data wat hy verloor het as oor die foon.

“Ek weet jy is die man wat langs my gesit het. Ek kan jou verseker ek sal jou kry,” het hy in ’n SMS aan die dief gesê.

“Kyk deur my nommers en jy sal weet in watter bedryf ek is,” het hy bygevoeg. “Stuur die foon terug na die adres hier onder as jy verstandig is.”

Die trant van die boodskap was onmiskenbaar dreigend; Zou werk in die kroegbedryf, wat baie Chinese vermoed skakels met bendes het.

’n Paar dae later het hy ’n pakkie met sy SIM-kaart en 11 bladsye sorgvuldig-handgeskrewe kontaknommers gekry en was hy blykbaar stomgeslaan.

“Dit sou ’n hele rukkie duur om net van een tot een duisend neer te skryf, dan praat ’n mens nie eers van die name en ’n hele string syfers nie. Ek neem aan (die dief se) hand is opgeswel,” het Zou gesê.

Chinese internetgebruikers het die dief geprys vir sy moeite, en hom “die gewete van die (diefstal)-bedryf” gedoop. Een gebruiker van Sina Weibo, ’n Chinese eweknie van Twitter, het geskryf: “Wat ’n simpatieke en getroue dief, iemand wat waarde heg aan professionele etiek.”

[Sapa]