Die liedjie, Let It Rain, is ook een van die eerste vrugte van sy besluit om hom op Christelike musiek toe te spits.

Die musiekvideo was sowat ’n jaar in wording, vertel hy. Heinz het verlede Oktober die besluit geneem om van kommersiële musiek na gewyde musiek oor te slaan, “want dis waar my wortels is. Kort nadat ek hierdie besluit geneem het, het ek ’n sterk las in my hart en gees ervaar vir ons boere wat so weens die droogte ly . . . ek het besef ons het nie net letterlike reën nodig nie, maar ook geestelike reën.”

As Matie was hy destyds ’n aanbiddingsleier in die Studentegemeente en daar het hulle dikwels die koor van gewyde lied Let It Rain gesing. Hy het besef dis die ideale lied om aan te pas vir sy droogte-opname. Die liedjie is ook op sy nuwe album, The Roar.

“Destyds het ek egter net die koorgedeelte geken en daarom het ek nuwe verse daarvoor geskryf. Ek het dit geskryf en begin sing waar boere en ander mense ook al bymekaargekom het om te bid vir reën.”

Om die liedjie op sy nuwe album te voeg, moes hy eers toestemming kry by die oorspronklike skrywer, die Amerikaner Michael Farren.

Heinz, wat op Somerset-Wes in die Suidwes-Kaap woon, het Michael eindelik ontmoet in Nashville, waar The Roar opgeneem is. Michael het nie net ingestem nie, maar Heinz ook gehelp om die liedjie vir die album en video te verfyn.

“Ek glo die droogte is ’n vergestalting van die geestelike droogte in ons land. My hartewens is dat hierdie lied en musiekvideo tot ’n positiewe uitkoms sal bydra,” vertel Heinz.

Die musiekvideo het in sy eerste ses dae op YouTube sowat 6 400 kykslae gekry.

Kyk hier na die video:

  • Sporadiese reënbuie word in die volgende week oor groot dele van die land voorspel, het Mbazhi Maliage, ’n weervoorspeller by die Suid-Afrikaanse Weerdiens. Maar die somer gaan baie warm en droog bly.