Ehlers-Danlossindroom (EDS) is op 10-jarige ouderdom by Sara gediagnoseer. Dié rare genetiese aandoening veroorsaak dat haar vel uiters pap raak, en dit laat haar dekades ouer lyk as wat sy in werklikheid is.

Sara het onlangs openhartig vertel hoe sy geleer het om haar lyf lief te hê – en haar boodskap het werklik trefkrag! 

“My pap vel was my grootste bron van onsekerheid,” het Sara in ’n essay vir The Mighty verklaar.

Volgens haar het sy dit in haar hoërskooljare probeer bedek, en sy wou nie hê enigiemand moet haar daaroor uitvra nie.

“My gesin het nooit in my grootwordjare gedink daar was iets spesifieks met my verkeerd nie, veral aangesien dit as ’n onsigbare siekte bestempel is. Wanneer ek probeer het om daarby aan te pas en meer wou leer oor die uitwerking van EDS en my toekoms daarmee, het dit nooit aandag geniet nie."

Sy het reeds op 7 –  drie jaar voor haar diagnose – agtergekom haar vel begin pap raak. Verskeie dokters het haar ondersoek en sy het reekse toetse ondergaan.

Dit het op hoërskool onmoontlik begin word om Sara se toestand te ignoreer en sy het jare met ’n lae selfbeeld gesukkel. Dit was eers op 23, ná ’n mislukte verhouding, dat sy weer begin dink het oor hoe sy haarself beskou.

“Ná ernstige selfondersoek het ek besef my lae selfbeeld is die oorsaak van my gebrek aan selfversekering en dit het ’n uitwerking gehad op al my sosiale en persoonlike verhoudings,” het sy geskryf.

“Ek het gemerk die haat wat ek vir sekere dele van my en my liggaam gekoester het, was die sneller vir my ongesonde ingesteldheid en ander mense het dit ook aangevoel.”

Sy het besluit om getrou te wees aan haarself en haar liggaam lief te hê met siekte en al.

“Ek is sedertdien daartoe verbind om my siekte te vertoon en bewustheid aan te wakker. Dit was werklik ’n moeilike reis, ’n moeilike pad.”

Volgens haar was haar niggie Yasmin en haar beste vriendin, Briana Berglund, die mense wat haar werklik gehelp het op die pad om bewustheid van EDS te bevorder. Sy het modelwerk begin doen en deel ook haar verhaal in die sosiale media.

“My doelwit is om lig te werp op ongesonde ingesteldhede wat ons deesdae in die mode- en modelwerkbedryf het. Ek glo ons letsels en teenstrydighede is die dinge wat die wêreld herinner aan dit wat ons as mense deurgemaak het.”

“Ons behoort nie aangemoedig te word om dit te bedek of verwyder nie, maar eerder om dit op te hemel!”

Haar mikpunt is om die eerste erkende model met EDS te wees en andere te help om die “ware skoonheid in hul binneste” te herken, het sy in The Mighty geskryf.

“Ek het dalk ’n siekte, en ja, my siekte is deel van my, maar ek sal dit vir niks ter wêreld wil verander nie. My fisieke gebrek herinner my saggies aan die vegter wat ek is. My plooie maak van my wat ek is. Daar is skoonheid in elke plooi en elk is op sy eie manier mooi. Niemand anders se plooie lyk presies soos myne nie en dit is wat ek as ware skoonheid beskou.”

“My doel is om die onsigbare versperrings van volmaaktheid wat die samelewing opgestel het, af te breek. Versperrings wat ons almal subtiel aansê om volmaak te wees in alle aspekte van die lewe, werk en sosiale en persoonlike wisselwerkings,” het sy gesê.

“ 'Jy sal gelukkig wees as jy só maer is,’ ‘As jy dít koop, sal jy gelukkig wees,’ ‘As jy só lyk, sal jy gelukkig wees.’ Werklik? Dit is die onvolmaaktheid wat ons volmaak maak en dit is wat ware skoonheid beteken. Iets waaraan ons almal herinner moet word: Wees lief vir jou liggaam, wees lief vir jouself, werk sagkens met jou liggaam, werk sagkens met jouself.”

Bronne: Allure, The  Mirror, The Mighty