Op die oewer van ’n meer tussen wingerde aan die voet van Paarlberg voel dit op hierdie laatmiddag asof die tyd stilstaan. Dan klink die geluid van ’n voertuig op. ’n Klassieke Buick kom aangery, en Johann Erasmus (28) se gesig helder op.

Carey Boucher (27), wat twee jaar gelede nog so siek was dat sy in ’n koma op die rand van die dood was, trap fyntjies by die ouwêreldse motor uit en kom dan grasieus nader gestap. Johann het Carey destyds nog skaars ontmoet toe sy hoor sy is dodelik siek, met miëloïed-leukemie wat reeds na haar lewer, borste, pankreas en vel versprei het.

Chemoterapie en maande in die hospitaal het gevolg. Dit was ook daar dat Johann Carey gevra het om met hom te trou... en toe wen hulle boonop ’n baie spesiale troue, die idee van die gewilde Afrikaanse sanger Kurt Darren.

Kurt wou vir ’n spesiale paartjie ’n liedjie skryf en dit op hul troue sing, en Huisgenoot het toe ’n kompetisie gereël waarin paartjies hul droomtroue kon wen: nie net met Kurt daar nie, maar ook alles wat hul groot dag volmaak sou maak, van die ringe en die onthaal tot die uitrustings en selfs die wittebrood. Kurt het 10 finaliste gekies en ons lesers het gestem.

By hul nuwe woonstel in Wynberg by Kaapstad het hulle twee dae voor hul troue vertel hoe lief hulle albei vir reis en vir kos is. Carey, ’n voedselkonsultant en resepontwikkelaar, het op hul eerste afspraak geweet sy en Johann, ’n IT-konsultant, praat dieselfde taal.

Met ’n bruid wat kos ken, wou dit gedoen wees om ’n spyskaart aan te bied wat haar nie teleurstel nie. Maar met die intrapslag was die heerlike spinasie-en-fetakaas-blaardeegpakkies gereed op die tafels. By elke bord was ’n sleutelring met ’n sonneblom van krale met die boodskap dat jy altyd na die blink kant van sake moet kyk. Toe klim Kurt op die verhoog en sing.

Dis ’n paartjie wat gelouter is, maar heel anderkant uitgekom het om opgewonde uit te sien na hul mooi toekoms saam.

Sien meer foto's en lees die volledige artikel in Huisgenoot van 18 Februarie.

Bespreek vir Skouspel!