Kurt Darren het in 2009 die meeste CD’s in Suid-Afrika verkoop. Sy CD Uit die diepte van my hart met die treffer “Kaptein, span die seile” daarop is volgens die amptelike lys van topverkopers die voorloper van die jaar met verkope van meer as 160 000. Dié CD was 35 weke lank op die lys van die 20 top-verkopers.

Teken in op Huisgenoot

Die 30 top-verkopers van die jaar word bereken deur te kyk na alle CD’s se vertoning deur die jaar op die amptelike weeklikse top 20-lys, wat op sy beurt bereken word aan die hand van verkoopsyfers soos handelaars dit verskaf.

Die top 30-lys is die naweek bekend gemaak en het ’n eerste opgelewer: die eerste vyf plekke word almal deur Afrikaanse sangers beklee.

Bok van Blerk was 2009 se naaswenner met sy CD Afrikanerhart (30 weke op die top 20). In die derde plek is 10 jaar platinumtreffers van Juanita du Plessis (28 weke), vierde is Breek die ys (23 weke) van Ray Dylan en vyfde Ons lieflinge/Our darlings (22 weke) van Rudi (Claase) en Corlea (Botha).

Op die internet

- www.kurtdarren.co.za

Wens vir Kurt geluk! Los 'n boodskap in die kommentaarveld hieronder