NIEMAND gee blykbaar om of dit wetenskaplik bewys is of nie, want hulle voel so aan hul bas hoe dié armbandjie van gomlastiek met ‘n superblink ``hologram’’-skyfie of twee hulle beter laat slaap, hulle vol energie pomp en enige denkbare pyn soos mis voor die son laat verdwyn.

Sportlegendes soos die sokkerster David Beckham glo dit help hom met beter balans en spiere wat vinnig herstel.

As jy na die krieket tussen Suid-Afrika en Indië gekyk het, kon jy kwalik die  sogenaamde kragbandjie aan Graeme Smith en sy Protea-maters se arms miskyk.

En die mense wat nie sport doen nie, sweer dié bandjie, wat in Suid-Afrika gemiddeld R400 by sportwinkels kos, gee hulle meer lewenslus by die werk en groter drif in die bed.

George W. Bush dra dit. Ook rolprentsterre soos Demi Moore, Leonardo DiCaprio, Gerard Butler en Robert De Niro. Prins William se aanstaande, Kate Middleton, spog self met een aan haar arm en plaaslik is die vuurvreter-politikus Patricia de Lille en haar hele gesin daarmee gesien. Ook Chester Williams, wat meen hy het nou veel meer energie in die gim en vernuf op die gholfbaan danksy sy kragband.

’n Bejaarde vrou van oor die tagtig sê sy het nie noodwendig meer woema nie, maar die bandjie het haar rugpyn laat verdwyn en sy is deesdae baie skerper van gedagte.

Dit alles ten spyte daarvan dat een van die sewe vervaardigers van hierdie mistieke armbandjies wat dermiljoene mense oor die wêreld se verbeelding aangegryp het, nou erken het hulle het geen wetenskaplike bewyse vir hul aansprake dat die bandjie jou krag, balans en soepelheid verbeter nie.

Power Balance in Australië moes erken daardie duur stukkie gomlastiek om die arm doen niks meer as ’n rubberbandjie nie, nadat die owerheid van daardie land hulle verplig het om hul misleidende advertensies te onttrek en vir mense wat voel hulle is mislei, hul geld terug te gee.

Lees die volledige artikel in die Huisgenoot van 10 Januarie 2011