Dié hartebreker laat nie gras onder sy voete groei terwyl die Twilight-reeks gemaak word nie – hy speel ook nou in Valentine’s Day. Ons kyk wat doen hy als.

Hy bou spiere

Hy sê dis harde werk om sy lyf tussen New Moon en die volgende Twilight Saga: Eclipse net so gespierd te hou. Benewens ’n daaglikse oefensessie, bestaan Taylor se dieet meestal uit laevet-proteïene soos hoenderborsies sonder vel, eierwit en groente en vrugte.

Twilight-aanhangers kan na die derde fliek uitsien omdat dit baie soos die boek Eclipse is, sê hy.

Die liefde

Taylor voel glo ellendig vandat sy medester in Valentine’s Day, die sanger Taylor Swift, hom afgesê het. Mense na aan hom sê hy wil haar terughê noudat albei Los Angeles toe getrek en hulle vrye tyd tussen sy flieks en haar musiekopnames het. ‘‘Hy glo absoluut daar is iets besonders tussen hulle en dis die moeite werd om te baklei daarvoor,’’ vertel ’n ingeligte. ‘‘Swift wil al haar energie aan haar loopbaan wy, maar Lautner wil nie die verwerping aanvaar nie. Hy beskou dit as net ’n klein terugslag in ’n langdurige liefdesverhouding.’’

Die volgende Spidey?

Taylor se naam is die jongste op almal se lippe om die superheld in Spider-Man 4 te speel. Tobey Maguire het kop uitgetrek om die hoofrol in The Hobbit te vertolk, en al Hollywood se ambisieuse jong sterre brand om sy plek in te neem. Eers is gegis dat Robert Pattinson die rol sou oorneem, maar sy woordvoerder het dit ontken.