Met dié dat die lewenskoste bly styg en werke ál veeleisender word, is dit geen wonder stresvlakke skiet ook die hoogte in nie.

In ’n ideale wêreld sou ons ons werk bedank en op ’n sonnige plek gaan woon, maar dit is waarskynlik nie volhoubaar nie. Ons moet ander maniere vind om die angs baas te raak.

Sport kan vir party mense ’n oplossing wees. Ander mense vind weer herhalende stokperdjies soos hekel en brei het ’n kalmerende uitwerking. Maar nou wend baie mense hulle na iets nuuts om hulle te help afskakel: inkleur. In Frankryk is die kunsboeke so gewild dat meer daarvan as kookboeke verkoop word. Maar hoekom is dit so gesog?

“Inkleur is ’n wonderlike manier om jouself aan die konsep van bewustheid bloot te stel,” het Tiddy Rowan, die skrywer van The Little Book of Mindfulness en Colour Yourself Calm, aan HuffPost UK Lifestyle gesê.

“ ’n Mens raak so verdiep in inkleur. Dis ’n buitengewone aktiwiteit. Trouens, as jy kyk hoe kinders met kryt speel, kan jy sien presies hoe boeiend dit is.”

Die skrywer voer aan inkleur verg so baie konsentrasie dat dit mense help kop skoonmaak. In hierdie oomblikke kan ander goed jou bewussyn te binne skiet – soos ’n feit wat jy vroeër die dag probeer onthou het of ’n manier om ’n probleem by die werk aan te pak.

Richard Merritt, wat vir die The Creative Therapy Colouring Book geteken het, dink deel van die bekoring van sketse inkleur, is die verband tussen die stokperdjie en kind wees.

“In daardie oomblik – wanneer jy gaan sit met ’n tradisionele stuk papier en penne met geen apps en geen geraas – keer jy amper weer terug na kind wees. Inkleur bied ’n bietjie ontsnapping,” verduidelik hy.

Daar is ook geen regte of verkeerde manier om die stokperdjie op die proef te stel nie. Vat bloot ’n boek en ’n paar potlode en val weg. Jy voel dalk eers simpel, maar dit kan jou regtig help kalmeer en ophou bekommer oor jou alledaagse lewe.

Dit is boonop ’n uitstekende manier om gehaltetyd met jou kind deur te bring!

© Cover Media