Ardi Rizal van Indonesië het ’n internetsensasie geword nadat hy as tweejarige gekiek is waar hy ’n skyf trek. Die wêreld was geskok deur die seuntjie se rookgewoonte van 40 sigarette per dag, en die regering het ingegryp en vir hom rehabilitasie aangebied.

Nou, drie jaar later, het Ardi ophou rook, maar hy het dit nou met ’n ander ongesonde verslawing vervang, berig die Daily Mail. Pleks van smeek vir rookgoed, vra hy nou ongesonde, vetterige kos, sê sy ma, Diane Rizal (28).

Sy gewig het toegeneem tot 24 kg, sowat 7 kg meer as wat hy behoort te weeg. Diana sê dis moeilik om nie in te stem wanneer die vyfjarige tekere gaan oor vetterige kosse nie, maar die familie laat hom nou ’n streng dieet van vars groente, vrugte en kleiner porsies volg.

Dokters hoop sodra hy 3 tot 6 kg verloor het, sal sy gewig aanpas namate hy ouer word.

-Petro-Anne Vlok

BRON: dailymail.co.uk