Twee ingenieursstudente van die George Mason universiteit in die Amerikaanse deelstaat Virginia het ’n brandblusser ontwerp wat vure met klankgolwe doodslaan.

Seth Robertson en Viet Tran het die blusser ontwerp as deel van ’n finalejaar-projek. Hulle wou graag iets nuttig maak wat mense kan help om hul alledaagse lewens te vergemaklik.

Die blusser blaas klankgolwe teen ’n presiese frekwensie uit wat die suurstof in die vuur as’t ware wegblaas.

“Die klankgolwe veroorsaak dan drukgolwe wat keer dat die vuur weer kan opvlam,” het Viet verduidelik.

Dié slimkoppe het lank gesukkel om die presiese frekwensie te vind waarop die klankgolwe die vuur blus. Hulle hoop die toestel sal eendag in veral kombuise geïnstalleer kan word om te help keer dat vlamme hand-uit ruk.

Kyk hier na ’n video-demonstrasie van die kontrepsie: