kimk11

Kim Kardashian het teruggekap oor beskuldigings dat sy te min tyd deurbring saam met haar dogter, North West.

Die werklikheidster, wat nou haar verloofde, Kanye West, op sy Yeezus-toer deur Amerika vergesel, het op Twitter teen die kritiek uitgevaar dat sy haar vyf maande oue dogter afskeep.

Die brunet was woedend nadat een van haar 18,8 miljoen Twitter-volgelinge glo haar band met North bevraagteken het in reaksie op ’n twiet wat sy Saterdag geplaas het. In die twiet het Kim gesê: “Ons het ons babadogter vandag die eerste keer gevat om te gaan swem. Sy was dol daaroor! #BestDayEver”, maar nie ’n foto van die geleentheid bygesit nie.

Die ster het laat hoor: “Jy klink so oningelig. Omdat ek nie elke beweging wat my dogter maak twiet of op Instagram deel nie, beteken dit ek is nie 24 uur per dag by haar nie? Ons deel wat ons wil. Of is dit omdat ek my verloofde by elke vertoning gaan ondersteun en foto’s plaas? Wanneer die baba gaan slaap, word ouers toegelaat om te werk en mekaar te ondersteun en dalk selfs pret te hê.”

Kim (33) het die afgelope ruk onder kritiek deurgeloop omdat sy elke aand Kanye se konserte bywoon pleks van tuisbly om na haar baba te kyk.

Die twee het ook Saterdagoggend sonder North gaan inkopies doen in die boetiek The Webster in Miami, Florida.