Gesondheidskoste is genoeg om ’n mens siek te maak. Lidmaatskap van ’n mediese skema raak ál duurder en dis geen wonder dat prys ’n groot oorweging speel wanneer verbruikers tussen skemas moet kies nie. Die goedkoopste keuse kan jou eindelik duur te staan kom as dit nie genoeg uitbetaal vir jou mediese behoeftes nie.

Doen goeie navorsing

Doen deeglik huiswerk om die beste skema vir jou behoeftes te kies. Vir ’n lys van al die geregistreerde skemas, bel gerus die Raad vir Mediese Skemas (CMS) by 086-112-3267 of gaan na www.medicalschemes.com. Jy kan dan die verskillende skemas regstreeks kontak vir besonderhede oor hul verskillende koste en voordele, of hul webtuistes besoek vir dié inligting. Jy kan ook by ’n finansiële raadgewer aanklop vir advies en by webtuistes soos medicalaidcomparisons.co.za inloer.

Voor jy besluit, let hierna op

Uitbetalingskoers. Stel vas watter persentasie van die pryse op die Nasionale Verwysingspryslys vir Gesondheid (NHRPL) die skema sal opdok. Dit word deur die departement van gesondheid opgestel en gee voorgestelde tariewe vir prosedures. Dokters en spesialiste vra gewoonlik baie meer as hierdie tariewe. Die NHRPL-tarief is net ’n gids. Dit kan byvoorbeeld aanbeveel dat ’n algemene praktisyn R190 per besoek vra. Maar ’n dokter word glad nie verplig om dit te vra nie en jou rekening kan meer as dit wees. As jou mediese skema dus 100 persent van die tarief betaal, sal jy steeds moet inbetaal. As die lys aanbeveel dat ’n prosedure R100 kos, kan jou dokter byvoorbeeld R300 vra, en jou skema net 200 persent van die aanbevole prys betaal – dus R200. Hoe kleiner die persentasie, hoe meer sal jy moet opdok om die verskil te vergoed.

Wie mag jou behandel?

Ál meer mediese skemas beperk jou tot spesifieke hospitale en dokters met wie hulle onderhandel het oor watter tariewe gehef mag word. Maak seker daar is verskaffers in jou omgewing.

Risiko-siektes

Die skema moet jou behoorlike dekking bied vir toestande waarvan daar ’n familiegeskiedenis is, byvoorbeeld hartsiektes en diabetes. As jou risiko vir kanker hoër is, maak seker die skema bied volledige behandeling. Baie van die goedkoper skemas bied net dekking vir kankerbehandeling in staatshospitale.

Chroniese medisyne

Stel vas hoeveel jou skema sal betaal vir die medisyne vir chroniese toestande soos asma, diabetes, hoë cholesterol en hoë bloeddruk wat jy gebruik of waarvoor jy ’n risiko het. Sommige skemas plaas beperkings op dié medisyne en kan vereis dat dit generies is.

Hospitaalkoste

Met die skerp styging in privaathospitaal-tariewe kan onbeplande hospitalisering jou finansieel vernietig as jy nie behoorlike dekking het nie. Daarom kies baie Suid-Afrikaners met ’n beperkte begroting ’n goedkoper mediese skema wat ruim hospitaalvoordele bied, maar nie veel anders nie. Maak seker die voordele is goed genoeg, en die NHRPL-uitbetalingskoers vir veral chirurge en ander spesialiste hoog. Die hospitaaldekking moet ook onder meer dialise en prosteses insluit.

Dag-tot-dag-uitgawes

Ál meer skemas verminder dekking vir doktersbesoeke en eenmalige medisyne en vereis dat jy dit betaal uit ’n spaarrekening of sogenaamde alternatiewe spaarinstrument. Die geld vir dié rekening word van jou maandelikse premie verhaal. As die geld in die spaarrekening op is, moet jy uit jou eie sak opdok. As jy net beperkte dekking vir dag-totdag- uitgawes kan bekostig, probeer self ’n ekstra bedrag per maand in jou eie spaarrekening opsysit vir onvoorsiene onkoste.

Tandheelkundige voordele

Mediese skemas verminder tans dié dekking en baie betaal net tandheelkundige voordele uit jou spaarrekening. Veral as jy kinders het, is dit verkieslik dat dié voordele uit die skema se gesamentlike risiko-poel kom.

- Helena Wasserman