Kêrels wat Kook gee meisies die kans om so kieskeurig as moontlik te wees terwyl die kêrels dit in die kombuis uitspook om haar guns te wen. Die eerste meisie wat moes uitvind watter kêrel nou werklikwaar weet wat die verskil tussen 'n konkoksie op die tafel en delikate cuisine is, is Emke Swarts.

GROEP 1: Arno Buitendag.

VOORGEREG:   KREEF TIAN

400 g gaar kreefvleis

75ml mayonnaise

20 ml suurlemoensap

uiegras (chives),

sout en gemaalde swartpeper na smaak

2 avokado’s

100 crème fraîche

3 pruimtamaties

3  salot-uie (spring onion)

15 ml  witwyn-asyn

20 ml olyfolie                                                                                                                                                       “wonton”-deeg

1 eier

30 ml sesamsaad-olie vir diep-braai

Kap kreefvleis en meng met mayonnaise, 15 ml suurlemoensap en gekapte uiegras.

Geur met sout en swartpeper na smaak.

Skil en kap die avokado’s en voeg orige 5 ml suurlemoensap en sout by.

Met ‘n skerp messie, sny ‘n kruisie aan die bo- en onderkante van die tamaties. Net diep genoeg om die vel te breek.

Blansjeer in kokende water vir 10 sekondes.Verwyder en plaas in yswater. Dit vergemaklik die verwydering van die skil van tamaties.

Om die Salsa te maak:

Verwyder die skil van die tamaties en sny in kwarte.

Verwyder die pitte  en pulp.

Sny die vleisgedeeltes in klein blokkies en meng met die fyngekapte salot-uie, witwyn-asyn en olyfolie.

Geur met sout en swartpeper na  smaak.

“Wanton crisp” – verf die geklitste eier oor die deeg.

Besprinkel  met sesamsaad en diepbraai tot goudbruin.

Om te bedien:

Verdeel die kreefmengsel in vier ewegroot porsies.

Gebruik ‘n ronde vorm (6 cm in deursnee en 6 cm hoog).

Vul met een porsie, druk liggies om lug uit te pers.

Skep 2 lepelsvol avokado bo-op die kreef, druk liggies vas en skep ‘n opgehoopte lepel crème fraîche oor die avokado.

Verwyder vorm, garneer met kruietakkies en bedien op roketblare.

HOOFGEREG:  Klassieke Biefstuk Wellington

10 g ongesoute botter

50 g sampioene, fyngekap

400 g beesfilet, in twee porsies verdeel

300 g blaardeeg

½ ui, geskil en fyngekap

1 toontjie knoffel, gekneus en fyngemaak

15 ml platblaar pietersielie, fyn gekap

1 eier, geklop

seesout en gemaalde swartpeper

Voorverhit die oond tot 200°C.

Smelt die botter in ‘n groot pan en braai die uie vir ± 5 minute totdat dit begin sag word, maar nie verkleur nie.

Voeg die sampioene by en braai vir ‘n verdere 5 minute, tot sag en romerig.

Roer die knoffel en pietersielie by en geur met bietjie sout en peper.

Laat staan eenkant om af te koel.

Braai die filet vinnig effens  bruin in verhelderde botter om te verseël.

Laat rus.

Hou die deeg in die yskas, tot benodig.

Rol die blaardeeg dun uit op ‘n meelbestrooide oppervlak, en deel in twee, groot genoeg om elk van die twee vleisporsies rondom te bedek.

Hou die oorskietstukkies vir garnering.

Verdeel die sampioenvulsel en skep ‘n strook in die middel van elk van die deegstukke en plaas die filetporsies bo-op die vulsel.

Verf die rande van die deeg liggies met geklitste eier en vou die deeg oor die vleis om twee netjiese pakkies te vorm, terwyl die rande deeglik verseël word.

Plaas die vleispakkies op ‘n bakplaat, laskant na onder.

Sny dekoratiewe blaartjies uit die afval-stukkies deeg. Verf die vleispakkies met geklitste eier, garneer met die deegblaartjies.

Verkoel vir 10 minute.

Bak 15 tot 20 minute of totdat die blaardeeg goudbruin is.

Plaas op opdienbord en laat rus vir 10 minute.Sny in dik skywe en bedien.

NAGEREG:  Sjokolademousse

125 g donker sjokolade, in stukkies gebreek

30 g ongesoute botter, in klein stukkies opgesny

30 ml sterk swart koffie of espresso

2 groot eiers, geskei

mespuntjie kremetart

60 ml witsuiker

2.5 ml vanieljegeursel

125 ml dik room (35 – 40 % bottervet)

garnering: geklopte room, vars frambose en sjokolade-skaafsels

Smelt die sjokolade, botter en koffie in ‘n medium-grootte vlekvrye staalbak, oor ‘n kastrol met stadig-kokende water.

Verwyder van die hitte en laat eenkant om af te koel.

Klits dan die twee eiergele in.

Bedek en plaas in yskas terwyl die eierwitte, asook die dik room geklits word.

Klits die eierwitte en kremetart met ‘n elektriese handmenger tot skuimerig.

Voeg 30 ml suiker geleidelik by en hou aan met klits totdat stywe punte vorm, maar die eierwitte steeds glansend en nie droog is nie.

Hou eenkant.

In ‘n ander bak, klits die dik room, orige 30 ml suiker en vanieljegeursel, totdat sagte punte vorm.

Verwyder sjokolademengsel uit yskas.

Roer ‘n paar lepels van die geklitste eierwit liggies en versigtig in die sjokolademengsel en vou dan versigtig, maar deeglik, die res van die eierwit in die sjokolademengsel.

Vou dan die geklopte room in.

Skep die sjokolademousse in ses individuele glasbakkies.

Bedek en verkoel in yskas vir ‘n paar uur of oornag.

Bedien met geklopte room, frambose en sjokolade-skaafsels.

KLIK HIER vir al die respte van Groep 1, soos verskaf deur kykNET.

Kêrels wat kook word Donderdagaande om 20h00 op kykNET uitgesaai.

Volg Huisgenoot op Twitter.