Die koeëls is ontwerp om die meeste weefselskade moontlik aan te rig, het die patoloog prof. Gert Saayman getuig.

So ’n koeël veroorsaak ernstige skade en gaan oop wanneer dit menslike weefsel tref.

Dokters weet hulle moet versigtig wees wanneer hulle sulke wonde behandel, want hulle kan hulself aan die projektiel sny.

Oscar het kop onderstebo in die hof gesit en sy gesig met sy hande bedek.

Hy het sy ore toegedruk en naar geword toe Saayman grafiese getuienis lewer.

Reeva het ’n blou verkleuring aan haar regterbinneboud gehad, wat veroorsaak kon geword het deur die koeëlwond aan haar regterheup.

“Maar geen projektiel kon gevind word nie,” het Saayman gesê.

Daar was ook ’n rooierige kneusplek aan haar regtertepel.

Die hof het gehoor dat Saayman ’n paar kneusplekke aan haar liggaam gevind het wat nie ’n gevolg van die skietery was nie.

Haar boonste ooglede was blou-rooierig en daar was sagteweefsel-swelsel, maar geen besering aan haar oë nie.

Die is nie veroorsaak deur direkte trauma nie, maar ’n skedelfraktuur.

Terwyl Saayman verduidelik het dit kon bloed gewees het wat uit die skedel gelek het, het Oscar harde braakgeluide gemaak.

Daar was ook kneusplekke aan haar regterbobeen wat nie met die skietery verbind word nie en agter haar linkerknie en -skeen.

Oscar staan tereg vir die moord op Reeva, wat op 14 Februarie verlede jaar deur ’n geslote badkamerdeur in sy huis in Pretoria geskiet is. Hy sê hy het haar vir ’n inbreker aangesien.

- Sapa