Was dit die gille van ’n vreesbevange Reeva Steenkamp of ’n angsbevange Oscar Pistorius wat op Valentynsdag verlede jaar deur die Silver Woods-landgoed weergalm het?

Getuies het beweer dat hulle ’n vrou daardie aand om hulp hoor skree het, maar volgens Oscar se verdediging was dit hy wat geskree het; hulle hou vol hy klink soos ’n vrou wanneer hy angsbevange is.

Monique Rissen-Harrisberg, die hoofuitvoerende beampte van The Voice Clinic, sê dis onwaarskynlik dat ’n man soos ’n vrou kan klink wanneer hy skree. Daar is wel mans met ’n hoë stem, maar dit is bitter moeilik om ’n man soos ’n vrou te leer skree.

’n Gespanne man sal die geluidsterkte van sy stem vermeerder, terwyl ’n vrou se stem in ’n gil sal verander. Monique voeg by dat ’n man nie regtig soos ’n vrou kan klink wanneer hy skree nie. “Vroue se gille het ’n hoër toonhoogte as mans s’n.”

Tog het adv. Barry Roux in die hof gesê die verdediging gaan bewyse lewer wat bevestig dat Oscar wel soos ’n vrou klink wanneer hy skree. “Ek stel dit aan jou dat dit wel so klink. Daar is desibeltoetse gedoen,” het hy aan die radioloog Johan Stipp gesê toe dié getuig dat hy ’n vrou se gille gehoor het.

Barry het bygevoeg die aard van Reeva se beserings het beteken sou nie kon nie skree nie.

-Petro-Anne Vlok

Bronne: news24.com, thevoiceclinic.co.za, iol.co.za