Kaitlyn het drie jaar gelede haar arms en bene weens bakteriële meningitis verloor, maar wanneer jy na haar grimeertegnieke kyk, sal jy dit skaars glo.

Still editing this look but I wanted to share this picture ?? #comingsoon #staytuned

A photo posted by Kaitlyn Dobrow (@kaitlyndobrow) on

Sy deel grimeerlesse op haar Instagram-profiel en het selfs ’n YouTube-kanaal waar sy al vir mense gewys het hoe om rokerige of goue grimering vir jou oë of skelpienk lipstiffie aan te wend.
Sy doen dit alles met behulp van prosteses. Kaitlyn het tans amper 70 000 volgers op Instagram.

Kaitlyn het in Februarie 2013 meningitis gekry. Op haar Facebook-profiel vertel sy van die moeilike tyd in haar lewe.

“Ek het die oggend lighoofdig en deurmekaar gevoel en ’n vreeslike kopseer en krampe gehad. Boonop het ek blou kolle oor my hele liggaam gekry en kon nie beweeg nie. Toe bel my ma 911,” skryf sy. “Die volgende dag was my hele lyf pers en geswel.”

“Die volgende week het blase oor my vel ontwikkel wat soortgelyk aan derdegraadse brandwonde was. Dit het daartoe gelei dat my vel begin disintegreer het. Binne weke het my vingers en tone swart geword. Die siekte het die sirkulasie na my arms en bene afgesny en dit het daartoe gelei dat dit geamputeer moes word.

“Die bakterie het 57 persent van my vel weggevreet en dokters moes die 43 persent van die vel wat nie geaffekteer was nie, gebruik om op dié areas oor te plant.”

In die ses maande dat sy in die waakeenheid was, het sy meer as 20 operasies ondergaan, sy was aan ’n voedingsbuis gekoppel en haar een long het platgeval.

Twee jaar daarna het sy geleer om met prostese te loop en sy gebruik nou prostese vir haar bolyf.

“Ek sou nie die ervaring vir enigiets ter wêreld verander nie. Dit het my nader aan God en my familie gebring en my verander in die mens wat ek vandag is. Ek beplan steeds om my drome in skoonheid en kook na te jaag.

“My lewe het nou net begin.”

Bronne: Ocregister.com, Dailymail.co.uk, Instagram.com