Jack Parow het sy mond en sy musiek met seep geskrop. Nou is al die grootste treffers op twee van sy albums, Jack Parow en Eksie Ou, sonder vloekwoorde uitgereik.

Die albums, wat hy die Super Seep Skoon-reeks noem, is nou vir sensitiewe ore van alle ouderdomme op iTunes beskikbaar.

“Mense vra al so lank ek moet dit doen,” sê Jack vir Huisgenoot. “Party mense wil dit vir hul kids speel, maar obviously wil hulle dit skoon hê.

“Ek het toe maar besluit dis tyd om ietsie terug te gee vir al die sexy ma’s en al die masekinners (Jack se versamelnaam vir al sy aanhangers) wat so baie daarvoor vra.”

Hy voeg by die musiek sonder al die vloekwoorde doen nie afbreuk aan die karakter daarvan nie.

“Dit behou die energie en die vibe, en dis die belangrikste. Ek is baie trots en bly oor die eindproduk.”

Sy nuwe album, Nag van die Lang Pette, word in Februarie volgende jaar uitgereik. Die lirieke sal dan weer ’n swetswoordjie of twee hê en sal vir die eerste keer in sy loopbaan op ’n dubbelalbum uitgereik word.

– Christiaan Boonzaier.