Ons weet nou al hy sit nie sy mond aan Yves St Laurent sigarette nie. So sing hy mos in daai song van hom Cooler as Ekke. En lite bier? Moenie laf wees nie. Die Afrikaanse rapper Jack Parow (28) is die überkoel man met die brandewyn in sy glas, die kenmerkende langpuntpet op sy kop en bonkige Mr T-ringe aan sy vingers. En natuurlik, soos hy self sê, “die ou met die snor by die bar”.

“Ek is gebore met ’n snor, man. En ek sal dit newwer as te nooit afskeer nie; dis dan so ’n mooi snor,” sê die man wat deesdae musiek maak saam met DJ Naaldekoker en ’n videojoggie genaamd DDCups aan sy sy.

“Sexy korrek” noem jy sy musiekstyl, vertel hy oor ’n koppie swart koffie met twee suikers terwyl hy aan ’n muffin met kaas en konfyt weglê.

Terloops, wat is die storie met die langpuntpette, gangster-ringe en kleurryke frokkies wat hy so graag dra?

“Ek laaiks dit; dis gevaarlik,” sê hy gou, en ingeval jy wonder: Jack se “gevaarlik” beteken eintlik dis koel. Sy ding met rap kom al ’n hele ruk lank aan; hy luister al vandat hy 12 is daarna.

Sy heel eerste musiekvonds was hoeka die amerikaanse rapper Snoop Dogg se album Doggy Style en die liedjies het hy word vir woord saamgesing, sê die musiekman wat sy hele lewe lank al agter die boereworsgordyn woon – daar in die noordelike voorstede van Bellville buite Kaapstad, die enigste haan onder die henne – hy het twee ouer sussies, Tasha en Tanya.

Lees meer oor Jack Parow in die winter-uitgawe van HuisgenootTempo.