Dis Hoeka Toeka soos jy dit nog nooit gehoor het nie!

[caption id="attachment_144787" align="alignnone" width="600"]Charlize Berg, saam met Hugo Ludik en Vaughan Gardiner Charlize Berg, saam met Hugo Ludik en Vaughan Gardiner.[/caption]

Die oorspronklike weergawe van Carike word gehoor in die fliek, wat vanaf 25 November in teaters draai, maar Charlize, Hugo en Vaughan se weergawe gaan as musiekvideo uitgereik word en vanaf 15 November op radiostasies opklink.

“Ek was op my senuwees om Carike Keuzenkamp se skoene vol te staan,” erken Charlize.

“Ek het in ’n huis grootgeword waar ons baie na Afrikaanse legendes geluister het en Carike was een van hulle.”

Die genre waarin Carike sing, is ook ietwat anders as waaraan Charlize gewoond is.

“Maar Vaughan en Hugo het hul stempel op die liedjie afgedruk en die spreekwoordelike tweede myl geloop. Hulle het die klank verwerk met my stem en styl daarop, maar dit steeds getrou aan Carike gehou,” verduidelik Charlize.

“Die weergawe waarmee ons geëindig het, is iets besonders. Dis ongelooflik mooi en kreatief met verskillende harmonieë en hoë note.”

Vaughan vertel dit was vir hom en Hugo ’n intimiderende maar opwindende uitdaging.

“Dis is so ’n groot en legendariese liedjie, en jy wil dit nie verwoes nie. Dit was ’n uitdaging om dit te omskep in iets waarna mense steeds wil luister en wanneer hulle dit hoor, hulle steeds sal dink: ‘Aaaah, dis daai liedjie!’ Ons wou die struktuur behou, maar dit vars laat klink en dit ’n lekker pop-vibe gee wat hedendaags is.”

Hugo verduidelik: “Popmusiek van vandag verskil van popmusiek van ’n paar jaar gelede.

“Die liedjie se koor is destyds baie meer herhaal en die uiteensetting was meer basies. Vandag luister mense 10 sekondes na ’n liedjie en dan soek hulle iets nuuts. Ons wou die liedjie kreatief en interessant omskep en by vandag se popstyl laat inpas. Ons het getrou gebly aan sekere elemente, soos die liedjie se melodie en lirieke, maar dit met instrumente soos tromme en kitare modern gemaak.

“Charlize kan ’n ongelooflike verskeidenheid dinge met haar stem doen en ons het die liedjie se verwerking rondom haar stem gebou.

“Natuurlik was ons op ons senuwees, want mense voel dalk die liedjie is eie aan Carike en ons wou dit nie oordoen nie,” verduidelik hy. “Maar soos ons aangegaan het, het alles mooi begin saamwerk en daar is regtig iets magies geskep. Vaughan glo hulle het dit reggekry om die gewilde liedjie te omskep tot iets hedendaags en kreatiefs, maar het steeds die essensie daarvan behou.

“Ek is baie gelukkig met dit wat ons eindelik reggekry het,” sê hy. Hugo meen hulle het grense verskuif.

Charlize is dit eens. “Ons het ná ses uur in die ateljee al drie baie opgewonde daar weg gestap.”

Hier is Carike se oorspronklike weergawe van die treffer:

  • Hoeka Toeka se verwerking deur Hugo en Vaughan met Charlize as sangeres sal op 15 November uitgereik word en die liedjie se musiekvideo word 19 November op Jukebox op kykNET bekendgestel. Dit gaan ook op huisgenoot.com gedeel word.
  • Vir die Voëls, die liefdesverhaal van die Huisgenoot-lesers Irma en Sampie de Klerk van Newcastle, is in samewerking met kykNET vervaardig en begin op 25 November in rolprentteaters draai. Die voormalige 7de Laan-aktrise Simoné Nortmann vertolk die rol van die vurige Irma en Francois Jacobs van Hollywood in My Huis-faam die vryer, Sampie.