KOP:

Genoeg vir 4-6 mense

Bereiding: 30 minute

Gaarmaaktyd: 40 minute

Jy benodig:

Botterskorsiesop

  • 15 ml (1 e) olyfolie
  • 2 uie, gekap
  • 2 knoffelhuisies, fyngedruk
  • 2 cm vars gemmer, gerasper
  • 1 groen brandrissie, ontpit en gekap
  • 1 kg botterskorsie, in blokkies gesny
  • 1 blik (400 g) klappermelk
  • 500 ml (2 k) hoenderaftreksel
  • 15 ml (1 e) mielieblom
  • handvol vars koljanderblare
  • sout en vars gemaalde swartpeper

Karringmelk-beetsop

  • olyfolie
  • 1 ui, gekap
  • 15 ml (1 e) balsemieke asyn
  • 500 g beet, gerooster tot sag en die skilletjies afgetrek
  • 500 ml (2 k) karringmelk
  • 15 ml (1 e) mielieblom
  • 250 ml (1 k) groenteaftreksel
  • 250 ml (1 k) lemoensap
  • sout en vars gemaalde swartpeper na smaak

Groenteskyfies

  • beet, in dun repe gesny met ’n groenteskiller
  • botterskorsie, in dun repe gesny met ’n groenteskiller
  • olie vir diepbraai

So maak jy:

soup1

Botterskorsiesop 

Verhit die olie en braai die uie, knoffel, gemmer en brandrissie tot geurig. Roer die botterskorsie, klappermelk en hoenderaftreksel by en bring tot kookpunt. Laat prut tot die botterskorsie sag is. Verdik met mielieblom aangemaak met ’n bietjie water. Bring tot kookpunt. Roer die koljander deur. Pols die sopmengsel in ’n voedselverwerker of met ’n staafmenger tot fyn en geur met die sout en peper.

Karringmelk-beetsop 

Verhit ’n bietjie olie en braai die ui tot sag. Roer die asyn en beet by en braai effens. Meng die karringmelk, mielieblom, groenteaftreksel en lemoensap, voeg by, roer deur en bring tot kookpunt. Pols die sopmengsel fyn en geur met die sout en peper na smaak.

soup2

Groenteskyfies

Braai die groenterepe in diepvetolie tot bros. Skep met ’n gaatjieslepel uit en dreineer op  kombuispapier.

soup3

Dien dit op

Giet elke sop in ’n maatbeker. Giet albei tegelyktydig in die sopbord of koppie; maak seker dat die soppe nie meng nie. Trek die agterkant van ’n lepel deur sodat die soppe liggies deurmekaarstreep. Sit voor met die groenteskyfies.

soup4

- Carmen Niehaus 

Foto’s: David Briers

Stilering: Jacques Erasmus