Prins William en hertogin Catherine het glo hul seun, prins George, se eerste kruipslag vroeër vandeesmaand misgeloop, want hulle het op die Maldive-eilande vakansie gehou terwyl Catherine se ouers hom opgepas het.

Die koninklike egpaar, wat onlangs ’n romantiese wegbreek op die Maldive-eilande geniet het, het blykbaar ’n groot mylpaal in hul agt maande oue baba se vormingsjare misgeloop terwyl hulle weg was.

Prins George se oupa en ouma Michael en Carole Middleton het by Catherine se gesinshuis in Bucklebury, Berkshire, na hom gekyk terwyl sy ouers ’n welverdiende ruskans by die vyfsteroord Cheval Blanc Randheli gekry het.

’n Bron het aan Us Weekly gesê: “William en Kate is opgewonde oor die vele mylpale wat voorlê. George het reeds ’n tandjie wat uitkom. En sy wange is ronder as ooit!”

Die egpaar het ’n romantiese tyd saam op die Maldive-eilande geniet voor ’n drie week lange koninklike besoek aan Australië en Nieu-Seeland volgende maand.

Die prinsie sal saamreis en sy nuwe Spaanse oppasser, Maria Teresa Turrion Borrallo, sal na hom omsien.

Die 43-jarige kinderoppasser wat William (31) en Catherine (32) onlangs aangestel het, is by die Norland College in Londen opgelei.