As hy die Noordpool was, was sy die Suidpool.Hy luister graag kloppende, kommersiële Afrikaanse musiek. Sy lê eerder rustig op die bank en drink die klassieke meesters in.

Maar die sanger Helenè Bester (33) en die man aan wie sy onlangs verloof geraak het, Jacques Theron (35), is juis gek oor mekaar omdat hulle so verskillend is en mekaar se wêrelde nou heerlik kan verken.

Helenè het Jacques nou al sover gekry om smiddae ná werk saam met haar te gaan draf, maar hy sien nog nie kans om vanjaar saam met haar die Twee Oseane-halfmarathon aan te durf nie. Intussen is Jacques druk besig om haar van sy ander groot liefde, die diererykdom van die Nasionale Krugerwildtuin, te leer.

Dis juis op ’n naweek hierheen dat die rekenmeester die groot vraag gevra het. Toe hulle aansit vir ’n afgesonderde kersligete, het Jacques gereken sy pragtige meisie weet teen dié tyd presies wat kom. Hy het toe net daar langs die tafel op sy knieë gegaan en haar gevra om sy vrou te word.

En Helenè het dadelik ja gesê, want ná 33 jaar het sy geweet die wag op die perfekte man was dubbel en dwars die moeite werd.

Die vrou met die diep stem en die liedjies met ’n nog dieper betekenis sing nou al sewe jaar voltyds. Sy het al vier CD’s agter haar naam. Die laaste een, wat pas verskyn het, is haar Grootste Treffers-album en dit verkoop flink.

Hul groot dag is in April by die Green Leaves Country Lodge by die Hartbeespoortdam. Hulle wou juis ’n plek vind met ’n informele, rustige atmosfeer.

Maar ’n klein troue gaan dit nie wees nie, vertel Helenè. Eers wou hulle net 150 gaste nooi, maar die getal groei omtrent elke dag. Nou staan dit al op 180!

Lees die volledige artikel in Huisgenoot van 11 Februarie.