Dis al weer die ou rympie: Seks is sonde. Of liewer, as jy nie dié en daardie reëls volg nie, dan is seks die ding wat jou in die verderf gaan dompel. Seks, sê die bekende Pretoriase Christen-seksoloog Elmari Craig, behoort binne ’n veilige raamwerk te gebeur, maar vergeet gerus maar daarvan dat een stel reëls binne daardie raamwerk vir almal sou geld.

Dis waarom Elmari se oë gerek het oor wat Gretha en Francois Wiid alles in Huisgenoot oor seks kwytgeraak het. ‘‘Ek het ’n problem daarmee dat Gretha en haar man een stel reëls predik wat vir almal moet werk. Ek sien soveel paartjies met ernstige seksuele probleme weens skuldgevoelens. Ek dink dit is onverantwoordelik om sulke waarde-oordele te vel asof dit die enigste waarheid is.’’

Elmari glo masturbasie is normaal en dat sekere seksspeelgoed jou kan help om die vonk in jou sekslewe te behou. Dat Gretha-hulle die “Gees van God’’ vir hulle alleen wil toe-eien wanneer hulle hul menings oor seks as die enigste waarheid voorhou, is emosionele manipulasie, meen Elmari.

‘‘Wat ’n jammerte as mense wat na antwoorde soek, in skuldgevoelens en skaamte moet verval eerder as in ’n gesonde viering van seksualiteit soos God dit bedoel het. Dit is vir paartjies ’n natuurlike proses om mekaar se liggame te ontdek. Soos jul emosionele verhouding groei, moet jul fisieke verhouding ook groei en ontwikkel.

“ ’n Man en vrou moet oor seks kan kommunikeer en weet wat hulle self stimulerend vind. En hulle moet veral gemaklik wees met hul eie en mekaar se liggame, om sonder skuldgevoelens weerloos bymekaar te kan wees.

“Want dit is in die weerloosheid en veiligheid by mekaar dat ’n mens jouself kan toelaat om die gawe en wonder van seksuele vervulling saam te ervaar. Dit is in wese ’n Goddelike en spirituele ervaring – mits daar nie onnodig rigiede en beperkende reëls en riglyne is nie.

‘‘Baie Christene worstel reeds met skuldgevoelens rondom seks, en om die riglyne te volg wat Gretha gee, plaas ons amper terug in die Victoriaanse tyd.’’

Lees die volledige artikel in Huisgenoot van 4 Maart.

Verlede week het lesers behoorlik hul stem dik gemaak oor Gretha - baie het met haar verskil, maar baie het ook saam met haar gestem en haar ondersteun. Wat dink julle van Elmari se opinie? Deel julle mening in die kommentaarveld hieronder.

Bespreek vir Skouspel!