Die derde troonopvolger, wat op 22 Julie in die Lindo-vleuel van die St. Mary-hospitaal in Londen gebore is, sal na verwagting dieselfde invloed op die ekonomie hê as sy ouers, die hertog en hertogin van Cambridge, se weelderige troue in April 2011, en sy ouma koningin Elizabeth se diamantjubileumvieringe verlede jaar.

Mark Di-Toro van VisitBritain se toerismeraad het aan die tydskrif Hello gesê: “Die koninklike baba gee ons die geleentheid vir ’n klompie goeie, gesinsvriendelike reis-idees en om die profiel van ons koninklike toeristebestemmings in Brittanje te verhoog.”

Sowat 600 000 mense het Buckingham-paleis besoek tydens die twee maande wat dit verlede jaar aan die publiek oopgestel is, en soortgelyke getalle word vanjaar in Londen verwag.

Plekke van koninklike belang, soos die St. Andrews-universiteit, Anglesey, Norfolk en Cambridge sal ook meer toeriste trek.

Mark het bygevoeg: “Ons hoop ook dat die aanvraag na gedenkwaardighede soos sleutelringe en porselein sal verhoog.”

Gedenkwaardighede van die koninklike baba is gewild onder versamelaars en aanhangers en is die Royal Collection Trust se porselein en huishoudelike items is gunstelinge.

Die volle naam en geboortedatum van sy koninklike hoogheid prins George van Cambridge verskyn op hierdie items, en dis versier met die goue kroon van die hertog en hertogin van Cambridge.