Hy het gister in Pretoria aan joernaliste gesê die regering ondersoek die saak. Die ondersoek kon nog nie afgehandel word nie weens druk om die staatsbegrafnis te reël.

Hy het die versekering gegee die regering sal verslag doen oor die uitslag van die ondersoek sodat hulle Suid-Afrikaners kan verseker die regte en waardigheid van gestremdes word beskerm.

Die Instituut vir Opvoeding en Ontwikkeling in Gebaretaal het Woensdag in Kaapstad gesê die tolk was ’n “totale bedrieër”.

“As hy waarde heg aan sy lewe, sal hy daaroor bieg omdat die dowe gemeenskap wêreldwyd woedend is,” sê die direkteur, Cara Loening.

Sy sê nie een van sy gebare tydens die gedenkdiens Donderdag in die FNB-stadion in Soweto het enigiets met gebaretaal te doen gehad nie.

“Dit was soos om iemand van die straat te kry en hom aan te sê om sy hande rond te swaai,” het Cara gesê.

“Hierdie man het ’n bespotting van die diens gemaak.”

Sy het gesê die tolk, wat op die verhoog was, het geen benul van gebaretaal nie.

Nog ’n tolk, ’n vrou, in die SABC-nuusberigte oor die diens, was ’n geakkrediteerde, gekwalifiseerde en akkurate gebaretaaltolk,” het Cara gesê.

Andries van Niekerk, die woordvoerder vir die Nasionale Instituut vir Dowes (NID), sê dis onaanvaarbaar.

“Die tolk tydens die diens was duidelik nie bevoeg nie en kon nie handvorms, bewegings of gesigsuitdrukkings tipies aan Suid-Afrikaanse gebaretaal gebruik nie,” het hy gesê.

Volgens hom betreur die NID dit dat dowes nie kon verstaan wat staatslui sê nie.

Wilma Newhoudt-Druchen, die adjunkvoorsitter van die Wêreldfederasie vir Dowes en die eerste dowe lid van die Suid-Afrikaanse parlement, het Dinsdag getwiet die tolk was ’n verleentheid, nie een van sy tekens het sin gemaak nie en hy moet van die verhoog verwyder word.

- Sapa