’n Vriend van een van die seuns van die Kaapse ma Hilary van Rooyen (53), wat vroeër vandeesmaand koelbloedig vermoor is, het vandag in die Bellville-landdroshof in die Moederstad verskyn.

In ’n skokwending in dié moordsaak is Regard Groenewald (23) Dinsdag by sy ouerhuis in Welgemoed in die noordelike voorstede in hegtenis geneem. Hy is vandag op borgtog vrygelaat.

Hilary se lyk is op 9 Mei by haar huis in Eversdal, Durbanville, buite Kaapstad gevind. In die hof is onthul dat sy met ’n potplanthouer doodgeslaan is, berig Netwerk 24.

Hilary, ’n ma van twee, se lyk is omstreeks 13:40 deur een van haar seuns ontdek. Stukkies glas, soos dié van ’n glaspot, is glo by haar op die vloer gevind in haar huis oorkant ’n vulstasie en kruidenierswarewinkel in Sondalstraat.

Volgens TygerBurger het ’n video-opname van die kruidenierswarewinkel gewys hoe ’n man die middag twaalfuur oor die huis se hek spring en dan wegloop.

Volgens Stefan Venter, staatsaanklaer, het die verdagte reeds oor die moord gebieg.

Groenewald was oënskynlik goed versorg maar senuagtig toe hy vandag in die hof verskyn, berig Netwerk24.

Volgens ’n verklaring wat deur sy regsverteenwoordiger in die hof voorgelees is, is dié voormalige projekbestuurder tans werkloos. Hy is al ’n paar jaar in ’n vaste verhouding en het geen vorige veroordelings nie.

Hy is op borgtog van R3 000 vrygelaat en moes sy paspoort inhandig. Hy mag ook nie met staatsgetuies in verbinding tree nie. Die saak is tot 7 Julie uitgestel.

Kyk hier na die video waarin hulde aan Hilary gebring word:

 

Bronne : Netwerk 24, Tygerburger