Jermaron Darries se ma, Deidre Darries (33), vertel: “Sy tande is al verrot. Die gewasse op sy gesig moet ook verwyder word.” 

Hoewel Jermaron reeds verskeie operasies ondergaan het, ontwikkel nog ’n gewas tans in sy gesig. Tog beskryf Deidre hom as ’n avontuurlustige kind wat nie vinnig moed opgee nie. “Hy is baie liefdevol en dapper,” het sy gesê. “Hy het ook ’n baie sterk wil.”

Jermaron, die oudste van die enkelma se vier kinders, het as fetus in die baarmoeder ’n beroerte gehad. Dit het hom serebraal gestrem gelaat. Hy is ook blind in sy linkeroog.

“Hy kry nog gereeld stuiptrekkings,” vertel Deidre. “Die medisyne wat die hospitaal hom gegee het, sal ook nie hou tot sy volgende doktersafspraak (in Augustus) nie.” 

Die gewasse is die gevolg van sogenaamde Delleman-sindroom, waaraan Jermaron ly. Minder as 50 gevalle van hierdie genetiese afwyking is al wêreldwyd aangeteken.

Deidre en haar kinders moet openbare gesondheidsdienste gebruik. 

Boonop is hulle afhanklik van ’n staatstoelae van R1 600, wat aan gesinne met ’n gestremde lid gegee word. Volgens Deidre is dit heeltemal te min om vir Jermaron die nodige sorg te kry.

Hiermee saam sukkel Deidre om seker te maak Jermaron neem die korrekte vloeistowwe in. Die bekommerde ma weet ook nie hoe sy vandeesmaand genoeg geld bymekaar gaan skraap om hul huurgeld te betaal nie. 

Sy moes bedank om haar seun te versorg omdat die openbaregesondheidsdiens nie vir hom ’n versorger kan voorsien nie.

Vir meer inligting besoek Jemaron se Facebook-blad.