Baie geluk, Elizma Theron en Nico Grobbelaar! Die sangeres en haar man, ’n helikopterloods, se dogtertjie is gebore!

Eli-zé weeg 3,13 kg. “Mamma en baba is gesond en alles het goed gegaan,” vertel Nico vanuit die hospitaal.

Net vroeër vandeesweek het ons op huisgenoot.com berig dat Eli-zé na verwagting in Maart gebore sou word. “Dis nou as sy nie vroeër wil kom hallo sê nie,” het Elizma toe gesê.

En nou is dit wraggies so! Elizma het gister op haar Facebook-blad bekendgemaak sy is in die hospitaal opgeneem weens sterk kraampyne.

Die kraampyne is onderdruk, maar Eli-zé wou duidelik sommer vandag al haar ma en pa ontmoet.

“Klein snip wil uit. Ons ontmoet Eli-zé Grobbelaar vandag. Bang, dankbaar, opgewonde, deurmekaar . . . alles gelyk. Mag ek vra dat julle asb. bid dat sy pragtig en gesond sal wees? Haar pappa het vanoggend in Botswana geland en is nou met ’n spoed op pad terug. Gebedjie vir hom ook, asb. Liefde xxxxx,” het sy vroeër vandag op Facebook geskryf.

- Loren Pienaar