Hy voel effens senuagtig, sê die akteur, sanger en liedjieskrywer Richard van der Westhuizen oor sy jongste album wat op die winkelrakke uitgepak is.

richard van der westhuizen

Soos met al sy voriges, is dié een, Yster & Vuur, ook met groot sorg aanmekaargesit, vertel die sanger. Sy vorige album, Swerwerspoor, is vyf jaar gelede uitgereik.

Mense vra hom altyd hoekom dit so lank geduur het om ’n volgende album uit te reik, vertel Richard. “Want ek werk stadig; dis hoekom!”

Ekstra spesiaal vir hom is dat sy seun, Conley, die tromme op Yster & Vuur gespeel het.

Lees ook: Snotkop vind sy cool kant in splinternuwe musiekvideo

Richard het in 1991 sy albuumdebuut met Tussen Treine gemaak. Die titelsnit, Ballade vir ’n Enkeling en vele ander is vandag nog treffers. Maar wat doen ’n liedjieskrywer wanneer hy moet skryf en die woorde wil nie kom nie?

“Jy raak baie verbouereerd en jy wil vlug!” skerts Richard.

Nee, hy is bevoorreg dat dit darem nie sommer met hom gebeur nie, sê hy dan op ’n ernstiger noot.

Sy vrou van die afgelope 25 jaar, Suzanne, verklap dat Richard baie buierig kan raak as hy skryf. “Dan gaan kuier ek maar by my vriendinne,” vertel sy en lag.

Onderlangs mompel Richard hy weet self nie hoe sy so lank met hom kon uithou nie.

Die titelsnit van Yster & Vuur word nou ook as ’n musiekvideo uitgereik. Dié liedjie gaan oor ’n terugskouing van ’n harderige lewe, verduidelik Richard. “Maar nie noodwendig myne nie!” skerm hy vinnig.

Daarin sing hy onder meer: Ek het brûe verbrand en met die duiwel gestoei / die houe gevat en vir die liefde gebloei.

Die musiekvideo word Saterdag 23 Julie op kykNET (DStv Kanaal 146) se Jukebox amptelik op TV bekendgestel, maar Huisgenoot-lesers kan so lank eksklusief daarna kyk: