Die moordhuis van Oscar Pistorius is vir R4,5 miljoen aan ’n mynkonsultant van Boksburg verkoop.

Louwtjie Louwrens het die vierslaapkamerhuis in die Silver Woods-landgoed in Pretoria gekoop en beplan glo om dit te verhuur.

Gemeet aan vroeëre berigte was dit ’n winskoop. Oscar het die huis se waarde gedurende sy borgverhoor verlede jaar Februarie as R5 miljoen verklaar.

In Maart vanjaar het sy eiendomsagent aan AFP gesê die huis gaan gedurende ’n geslote bodproses verkoop word en die beginbod is R5 miljoen.

Met ’n geslote bodproses kan belangstellende kopers nie vooraf na die huis gaan besigtig nie. ’n Potensiële koper kry ’n stel huisplanne, maak ’n bod en betaal ’n deposito wat terugbetaalbaar is.

Die huis se oppervlakte is glo sowat 700 m2, wat beteken Louwtjie het sowat R6 428 per vierkante meter betaal. Ander huise in dieselfde landgoed wat op die oomblik op die mark is, word vir tussen R7 000 en R8 800 per vierkante meter geadverteer.

Ekstra bronne: Beeld.com, News24.com, Property24.com