Die polisie was in die 19-jarige ster se huis in Calabasas, Kalifornië, op soek na bewyse wat verband hou met die eiergooiery by sy bure se huis verlede week, en het Lil Za daarna vir dwelmbesit aangekla.

Lt. David Thompson van die polisie in Los Angeles het aan verslaggewers gesê: “Die kokaïen was duidelik sigbaar toe die polisie op soek was na ander bewysstukke. Justin word nie met die kokaïen verbind nie, behalwe dat die jong man in sy huis gewoon het.”

Lil Za, wie se regte naam Xavier Smith is, is ’n ou pel van Justin en woon glo al maande in die sanger van die liedjie Change Me se huis. David het bygevoeg dat Justin sy samewerking tydens die klopjag gegee het, maar omdat sy prokureur nie teenwoordig was nie, het hy nie “enige vrae beantwoord toe ons daar was nie”.

Hy het ook bevestig dat beeldmateriaal van veiligheidskameras in die ster se huis verwyder is as deel van hul ondersoek na die eiergooiery, waarin Justin ’n verdagte is, en waartydens sowat R217 000 se skade aan die bure se eiendom aangerig is.

’n Bron na aan die sanger het gesê hy is baie ontsteld oor die klopjag. ’n Vriend van die sanger het aan RadarOline.com gesê: “Hy is natuurlik baie ontsteld dat die polisie eintlik vrye teuels gehad het om sy persoonlike besittings in sy huis te deursoek. Justin is buite die huis gehou terwyl die polisie die huis deursoek het en verskeie polisielede het hom dopgehou.”