Raapie Knaapie, een van die lede van DJ Ossewa, is Sondag in ‘nongeluk oorlede. Hier is 'n onderhoud met die groep en Raapie wat in die huidige Tempo verskyn.

Dit het alles begin met ’n Weber-braaiketel-ekspo in 2005 by die destydse Randburg-waterfront.

En die stille wete dat desperaatheid dikwels die begin is van die beste idees. Soos die stigter van DJ Ossewa, Riaan vanWyk (33), alias Daniel Jakobus, jou gou vertel: ‘‘Daai dag het ons besef ons gaan in elk geval ons naam met ’n plank slaan, toe besluit ons om dit maar ordentlik te doen.

‘‘Ons het gesien dit gaan nie werk om te probeer cool wees as ons nog nooit saam kon oefen nie, toe probeer ons maar snaaks wees. Ons het soveel moontlik tjol aangejaag op die verhoog.’’

En daar werk dit toe skitterend – hulle was skaars van die verhoog af, toe het hulle vier besprekings van mense in die gehoor. ‘‘En skielik het ons gedink: Jis, kwaai, ons kan geld maak!’’ sê Riaan.

Dat hulle hoegenaamd saam in ’n groep beland het, was eintlik blote geluk. Riaan, ’n vryskutmusiekvervaardiger, het met instrumentale weergawes van die musiek wat DJ Ossewa vandag maak, geëksperimenteer en toe ’n  platemaatskappy daarmee genader. Hulle het van die klank gehou.

Eers wou hulle net opnames daarvan vir ander albums hê, maar toe besluit hulle die klank kan tog op sy eie werk –  mits hulle ’n groep kan kry om dit uit te voer. Riaan moes vinnig plan maak en hy het sy pel Pieter Rischmüller (34), oftewel die groep se voorsanger, Piet Pompies, genader.

Toe was dit soos telefoontjie: Piet Pompies het Jerbes de Bruyn (36), Die Leeuboer en baskitaarspeler, nader gehark, en Jerbes vir Dwayne Venter (21), oftewel Raapie Knapie, die trekklavierspeler.

So is DJ Ossewa toe gebore.

‘‘Ons het dadelik oor die weg gekom. Ons was almal spontaan saam simpel,’’ sê Riaan. Maar waarom die vreemde, karikatuuragtige alter ego’s?

‘‘Daar was planne vir ’n TV-reeks.  Ons het die idee gehad om ’n Afrikaanse sitkom te maak, iets soos Koöperasiestories, en kykNEt  het daarin belanggestel,’’ vertel Pieter.

‘‘Ons het karakters uitgedink, maar toe te besig geraak met vertonings. Toe span ons maar die karakters op die verhoog in, en dit het so lekker gewerk dat ons net nie weer opgehou het nie.

‘‘Dwayne was destyds nog op skool. Hy was maar 16 en ons moes soms by sy skoolhoof toestemming kry dat hy vertonings kon bywoon,’’ vertel hy.

Dwayne skud sy kop by die herinnering. ‘‘Ja, ek het eendag ná skool nie tyd gehad om vooraf nog my skoolklere uit te trek nie, en toe word dit sommer my karakter: Raapie Knapie, die vertraagde jonger boetie van Daniel Jakobus.’’

Die storie loop so: Daniel Jakobus en Raapie – albei, sal ons maar sê, effens stadiger as die gewone mens – is broers en woon op die plaas Ossewasrus naby die dorp Petronella noord van Pretoria. Hulle was eintlik ’n drieling, maar Raapie het volgens oorlewering die derde kind opgeëet.

Die rokjagter Piet Pompies is hul neef en Die Leeuboer, so genoem omdat hy so ‘‘taai en rof soos ’n leeu’’ is, woon op die buurplaas.

So suksesvol is die fiktiewe karakters dat sommige aanhangers sukkel om die werklikheid van die illusie te onderskei.

Mense praat gereeld bitter stadig met Raapie en Daniel Jakobus, die twee wat elke dan en wan op die verhoog  verkondig dat hulle ‘‘maar stil is omdat hulle lisdeksie het’’.

Altyd lus vir ’n grappie, dis dié spul . . .

DJ Ossewa is vyf jaar oud en het al ses albums en twee DVD’s agter hul naam. Manne-wa-lus het verlede jaar die Tempo-toekenning vir die gewildste DVD gewen, en vier van hul CD’s en ’n DVD het al goue status behaal.