’n Studie deur die Harvard-universiteit, wat R200 miljoen gekos het en die afgelope 75 jaar 268 jong mans bestudeer het, het eindelik ’n groot vraag beantwoord: Wat het mans nodig om ’n vol en gelukkige lewe te lei?

Die Beatles het dit al in 1967 geweet: Al wat jy kort, is liefde.

Die studie, wat volgens feelguide.com in 1938 begin het en die groepie mans van hul studentedae tot in hul 90’s bestudeer het, word beskou as die omvattendste van sy soort.

Die grootste bevinding is dat die sleutel tot “geluk (by mans) liefde is. Punt.” Die studie het ook gevolgtrekkings gemaak oor mans en alkoholmisbruik, hul sekslewe en die voordele van ’n goeie verhouding tussen ma en seun. Hier is die hoogtepunte:

  • Alkoholisme in mans is die grootste enkele rede vir egskeidings;
  • Konserwatiewe mans staak hul sekslewe oor die algemeen op 68, terwyl liberaler mans ’n gesonde sekslewe tot in hul 80’s het;
  • Mans wat ’n goeie verhouding met hul ma het, is produktiewer by die werk en verdien gemiddeld R870 000 meer as mans wat ’n slegte verhouding met hul ma het;
  • Mans is op hul gelukkigste in hul huwelik ná die ouderdom van 70;
  • Die liggaamlike verandering by mans ná 80 is weens gesondheidsbesluite wat hulle ná 50 neem.

– Christiaan Boonzaier