7de Laan Vier Fees

En die kersie op die koek? Jy kan deel in die pret en skouers skuur met van jou gunsteling-akteurs.

Matrone (Annelize van der Ryst-Hattingh), Charmaine (Vinette Ebrahim), Oubaas (Pierre van Pletzen), Gita (Jo da Silva), Hilda (Annelisa Weiland), Vince (Jacques Blignaut), Emma (Bertha le Roux) en Aggie (Mimi Mahlasela) se resepte is ingesluit by die boek en dié akteurs gaan almal saamkuier.

Die verrigtinge skop om 09:30 af by die Gautrein-stasie in Hatfield, waar die publiek die geleentheid sal hê om saam met die akteurs Sandton toe te ry. Die amptelike boekbekendstelling begin om 12:00 in die binnehof voor Checkers in Sandton City. Almal is natuurlik welkom om ’n draai daar te gaan maak.

Gys de Villiers gaan die seremoniemeester wees en al die akteurs sal tot 14:00 daar wees om boeke te teken.

In dié tweede kookboek is veral gekonsentreer op resepte vir feestelikhede en vierings in die Laan, soos die resepte vir die safari-ete, wat onlangs uitgesaai is, en Errol se 21ste verjaardagpartytjie.

Hier is solank ’n voorsmakie van die resepte vir drie watertandgeregte:

Matrone se lamsosaties

Matrone se lamsosaties

Ná vele dae en nagte van wroeg het ek besluit om tog hierdie resep vir julle te gee. Dis ’n geheime familieresep wat al dekades lank aan die voorpunt staan van my reeds legendariese kookvernuf. Ek deel dit nie eens met die dames van die Vereniging van Veteraan-Vonkelvroue nie. Maar voor Speekbeentjies jul gestelle deurmekaarklits met een van haar belaglike konkoksies, hier is my spesiale lamsosatieresep – perfek vir enige braai. Die marinering van die lamsvleis is van uiterste belang. Moenie rondstaan en klets terwyl jy met die proses besig is nie, en maak seker die vleis is van hoek tot kant bedek met die sous. Uitnemendheid verg toewyding, veral in die kombuis! Die eindresultaat is die sappigste sosaties duskant die Limpopo – ’n smulhappie wat sekere ander mense se pogings verdrietig vervelig laat lyk.

Bestanddele

1 kg lamsboud, in 2 cm-blokkies gesny

Marinade

30 ml (2 e) fyn komyn

15 ml (1 e) gerookte paprika

5 ml (1 t) neutmuskaat, verkieslik vars gerasper

15 ml (1 e) borrie

2,5 ml (½ t) rooipeper

5 ml (1 t) sout

125 ml (½ k) vars pietersielie, gekap

2 knoffelhuisies, fyn gekap

125 ml (½ k) droë sjerrie

60 ml (? k) olyfolie

Bedruipsous

60 ml (? k) sjerrie

2,5 ml (½ t) rooipeper

5 ml (1 t) gerookte paprika

Metode

  1. Marinade Sit die lamsblokkies en marinadebestanddele in ’n verseëlbare plastieksak, soos ’n Ziploc-sakkie. Skud die sak om seker te maak die vleis is heeltemal met marinade bedek. Sit dit in die yskas en marineer oornag.
  2. Bedruipsous Meng al die bestanddele.
  3. Sosaties As jy houtsosatiestokkies gebruik, week dit ’n paar uur in water om te voorkom dat dit brand wanneer jy die sosaties oor die kole braai.
  4. Ryg die lamsblokkies aan die sosatiestokkies en braai die sosaties 15–20 minute oor matige kole. Draai om en bedruip die sosaties gereeld tydens die braaiproses.

Vince se skelvis-prei-en-roomkaastert

Vince se haddock

Een van die beste dinge waarmee die Britte ooit vorendag gekom het, is skelvis vir ontbyt. Ek weet nie almal sien kans vir ’n stuk vis vroeg in die oggend nie, en Bonita sê dis waar sy die streep trek. Maar as ek hierdie heerlike romerige tert vir ons sjampanje-ontbyt maak, vra sy altyd ’n tweede snytjie. Probeer dit saam met slaai of klein aartappeltjies in die skil gekook vir ’n heerlike ligte middagete, of sit dit voor as ’n southappie by ’n tee. Dis een van die deli se beste verkopers en selfs Matrone het  my al die resep gevra, so dis beslis ’n wenner.

Bestanddele

Broskorsdeeg

400 ml koekmeel

1 ml (¼ t) sout

125 g botter, in klein blokkies gesny

60 ml (? k) koue water

meel vir knie en uitrol van deeg

Vulsel

50 ml botter

2 preie, fyn gesny

olyfolie vir smeer- en besprinkelingsdoeleindes

400 g gerookte skelvis (probeer natuurlik gerookte vis kry, eerder as kommersiële, geel gekleurde vis)

250 ml (1 k) room

50 g roomkaas

1 eier

2 eiergele

60 ml (? k) vars Italiaanse pietersielie, grof gekap

sout en swartpeper

Metode

  1. Broskorsdeeg (kyk wenk) Sif die meel en sout saam in ’n groot mengbak. Sny die botter met ’n mes daarby in.
  2. Vryf die bottermengsel met jou vingerpunte tot dit soos fyn broodkrummels lyk.
  3. Maak ’n holte in die middel en meng die water bietjie vir bietjie by tot die mengsel van die kant van die mengbak wegtrek en ’n stewige deeg vorm.
  4. Verwyder, plaas op ’n meelbestrooide oppervlak en knie liggies tot glad. Moenie die deeg te veel hanteer nie, anders raak dit te warm.
  5. Draai toe in kleefplastiek en laat 20 minute in die yskas rus.

Wenk

Blind bak

  1. Voorverhit die oond tot 180 °C.
  2. Spuit ’n 20 cm-losboomtertpan met kleefwerende kossproei, of smeer met botter.
  3. Rol die deeg op ’n meelbestrooide oppervlak uit om in die tertpan te pas. Sit in die pan en druk dit op die boom en teen die kante vas. Sny die oortollige deeg af en maak die rand netjies.
  4. Plaas waspapier op die kors en sit droë bone of ongekookte rys bo-op die papier om dit vas te hou.
  5. Bak 15 minute in die oond, verwyder die bone en waspapier, en sit nog 5–6 minute in die oond om te bak tot dit gaar en goudbruin is. Moenie die oond afsit nie; jy gaan dit vir die vis gebruik.
  6. Vulsel Smelt die botter in ’n groot, diep pan oor lae hitte. Voeg die preie by en braai tot sag maar nie bruin nie. Verwyder en laat afkoel.
  7. Smeer ’n bakplaat liggies met die olyfolie en plaas die skelvis daarin. Besprinkel met die olyfolie en sit 6-7 minute in die oond, of bak tot gaar.
  8. Verwyder en vlok die vis.
  9. Klits die room, roomkaas, eier en eiergele goed in ’n mengbak.
  10. Voeg die gevlokte skelvis en pietersielie by, en geur na smaak met die sout en swartpeper.
  11. Gooi die vulsel in die gebakte tertkors en bak 20 minute in die oond of tot die vulsel gestol en goudbruin is. Sit snye van die tert voor saam met ’n wortelslaai met ’n lemoengegeurde vinaigrette.

Charmaine se broodpoeding

Charmaine se broodpoeding

Wat poeding betref, kom niks by die ou staatmakers wat van jou ouma na jou ma na jou eie kombuis oorgedra is nie. Boaan my lys is broodpoeding. Errol kom gereeld Saterdae met ’n brood onder die arm hier aan en dan hou hy hom ewe onskuldig en maak of hy gedink het die brood is op. Hy is nie eens subtiel wanneer hy skimp dat ek dit dan seker maar vir broodpoeding moet gebruik nie. Ek moet erken, daar is geen lekkerder soetding om ’n Sondagmiddagete mee af te sluit nie. Dis veral ’n goeie opsie as die beursie teen die einde van die maand so ’n bietjie dun is. ’n Rukkie terug het ek Hilda en oom Oubaas genooi. Ná sy tweede bordjie het oom Oubaas die bak poeding so bekyk en met ’n kreun gesug: “Ai, hoe wens ek nou my hele lyf was pens.”

Bestanddele

5 eiers

75 ml (5 e) kakaopoeier

75 ml (5 e) strooisuiker

300 ml room

700 ml melk

8 middelslag- of 4 groot croissants (altesaam ongeveer 470 g), gehalveer

100 g melksjokolade, in blokkies gebreek

80 g kasjoeneute, gerooster en grof gekap

ekstra suiker om bo-oor te strooi

vanieljeroomys of vla vir opdiening

Metode

Voorverhit die oond tot 180 °C.

  1. Spuit ’n relatief diep oondbak van ongeveer 25 x 30 cm met kleefwerende kossproei.
  2. Voeg die eiers, kakaopoeier en suiker in ’n groot mengbak. Klits tot glad en romerig. Voeg die room en melk geleidelik by terwyl jy klits tot heeltemal gemeng.
  3. Doop die croissanthalwes een-een vir ’n paar sekondes in die melkmengsel om daarvan te absorbeer. Pak dit dan in lae in die voorbereide oondbak en gooi die res van die melkmengsel bo-oor.
  4. Druk die sjokoladeblokkies orals tussen die croissants in. Strooi die kasjoeneute oor, gevolg deur ’n strooisel suiker na smaak. Moenie te veel suiker byvoeg nie; jy wil net so ’n klein bietjie krakerigheid bykry.
  5. Bak 25–30 minute of tot goudbruin.

Sit die poeding voor met vanieljeroomys of winkelvla.

* Vir nog besonderhede oor die rit op die Gautrein en om plek te bespreek, gaan na www.webtickets.co.za.