“Ek’s Fukuppy. Aangename kennis,” sê ’n glimlaggende eier met blou vlerkies en rooi skoene op die webtuiste van Fukushima Industries, ’n yskasvervaardiger in Osaka, Japan. Fukuppy is ’n gelukbringer vir dié maatskappy.

Die naam het ’n uitjouery op die internet ontlok, maar die maatskappy hou vol dis alles ’n misverstand.

Fukuppy sê verder op die maatskappy se webtuiste: “Ek dink ek is gaaf met ’n sterk sin vir geregtigheid, maar mense sê my kop is effens deurmekaar.”

’n Woordvoerder vir die maatskappy het gesê die gelukbringer se naam het niks te doen met die Fukushima-kernramp van 2011 nie, maar wou nie kommentaar lewer oor of hulle die impak van die naam in ander tale deurdink het nie.

Die naam Fukuppy is waarskynlik ’n verbinding van die eerste deel van die maatskappy se naam, Fuku, en die einde van die woord “happy”. Dit is glo algemeen vir maatskappye en organisasies in Japan om ’n soortgelyke gelukbringer as deel van hul bemarkingsveldtogte te gebruik.

Dikwels word dié karakters in die lewe gebring deur volwassenes wat in groot kostuums by geborgde geleenthede rondloop. – Sapa