[caption id="attachment_163121" align="alignnone" width="600"]Foto: Cover Media Foto: Cover Media[/caption]

’n Span van die Universiteit van Exeter het gesonde mense tussen 65 en 77 jaar oud bestudeer wat elke dag gekonsentreerde bloubessiesap gedrink het, en vasgestel hulle toon verbeterde kognitiewe werking, beter bloedtoevoer na die brein en beter aktivering daarvan tydens kognitiewe toetse.

Boonop het hulle bevind die inname van die sap het die deelnemers aan die ondersoek se geheue verbeter.

Bloubessies bevat volop flavonoïede, wat propvol antioksidante is en inflammasie kan teëwerk.

Dr. Johanna Bowtell, hoof van sport- en gesondheidswetenskappe aan Exeter, sê al neem mense se verstandelike vermoëns geleidelik af namate hulle ouer word, versterk die navorsing die opvatting dat die verstand langer helder kan bly as mense gesond leef en ’n plantgebaseerde dieet volg, met ander woorde hul inname van diereprodukte beperk.

“In die navorsing het ons bevind as ’n mens net 12 weke lank elke dag 30 ml gekonsentreerde bloubessiesap inneem, verbeter dit die bloedtoevoer na die brein, die werking daarvan en sekere aspekte van werkgeheue by hierdie groep gesonde, ouer volwassenes,” het sy gedeel.

Twaalf van die 26 deelnemers aan die navorsing het een keer per dag gekonsentreerde bloubessiesap – gelykstaande aan 230 g bloubessies – gekry, terwyl die ander 14 ’n plasebo gekry het.

Al die deelnemers het voor en ná die 12-weke-tydperk ’n reeks kognitiewe toetse ondergaan, waartydens ’n MR-skandeerder die breinfunksie gemonitor het en bloedtoevoer na die brein in ’n rustende posisie gemeet is.

By mense wat die bloubessiesap gedrink het, is daar heelwat verhoging in breinaktiwiteit opgemerk in die gedeeltes wat getoets is, in teenstelling met dié wat die plasebo gekry het.

Almal wat aangedui het hulle eet meer as vyf porsies vrugte en groente per dag, is by die toets uitgesluit, en al die deelnemers is aangeraai om deurgaans hul gewone dieet te volg.

Die volledige studiestuk is in die tydskrif Applied Physiology, Nutrition and Metabolism gepubliseer.

© Cover Media