[caption id="attachment_125909" align="alignnone" width="600"]Justin Serrao Justin Serrao se nuwe weergawe van die Koos Dup-treffer is reeds meer as 15,000 keer op YouTube gekyk.[/caption]

Justin (28), ’n sanger van Roodepoort wat luisteraars al met country-poptreffers soos Raining in my Soul en No One Cares vermaak het, verras nou met sy verwerking van die Koos du Plessis-liedjie Kinders van die Wind.

“Hoewel ek eintlik Engels is, het talle mense my al gevra of ek nie in Afrikaans wil probeer sing nie,” vertel dié Engelsman op sy beste Afrikaans. “Wel, die tyd het aangebreek.”

Justin het saam met ’n vriend, Regardt Scheepers, die projek #ToeEnNou begin. “Met hierdie reeks wil ons hulde bring aan groot Afrikaanse liedjieskrywers en sangers,” vertel Justin. En daar is geen beter manier om die projek te begin as met Koos du Plessis se musiek nie.

Lees ook: Pierre Greeff en Loki Rothman voer jou mee in roerende duet saam

“Sy lirieke het soveel betekenis en ontroer baie mense. Kinders van die Wind het beslis ’n spesiale plekkie in die hart van Suid-Afrikaners.”

Met die projek wil Justin en Regardt nog talle ander Afrikaanse treffers ’n nuwe baadjie aantrek. Oor watter lied hulle volgende gaan aanpak, is Justin nog geheimsinnig. “Dis eintlik ’n verrassing,” sê hy. Maar hy verklap wel luisteraars kan ook uitsien na musiek van Anton Goosen en Lochner de Kock.

“Die reaksie op Kinders van die Wind was ongelooflik,” sê Justin. Die musiekvideo daarvoor is reeds byna 15 000 keer op YouTube gekyk.

Hul nuwe weergawe van die liedjie het selfs die aandag van Steve Hofmeyr getrek. Hy het gevra Justin en Regardt moet die lied by een van sy vertonings sing.

Lees ook: Eerste voorsmakie van gewilde Jay en Lianie se prettige nuwe musiekvideo

Maar vloei die Afrikaanse lirieke maklik oor sy tong? Justin lag. “Dis nogal ’n uitdaging om Afrikaans te sing, hoor. Die lirieke van baie Afrikaanse liedjies het soveel betekenis en die melodieë is so meesleurend. Dit is vir my ’n voorreg om hulde te bring aan hierdie ryk erfenis.”

Justin was vyf jaar oud toe hy aan musiek blootgestel is. “My oom het kitaar gespeel en ek het net gedink dis awesome,” onthou hy. “Wanneer hy nie daar was nie, het ek in sy kamer ingesluip en op sy elektriese kitaar ge-jam!”

Hy het intussen al ’n ver pad gestap en het reeds twee albums uitgereik. ’n Derde word in Augustus uitgereik, maar gaan vir eers, nes die voriges, net Engelse snitte bevat.

Lees ook op Huisgenoot.com:

Dis hoe jy swendelaars se Facebook-skelmstreke uitken

Sinead O’Connor ongedeerd gevind ná polisiesoekto

3 kg haarbol uit vrou se maag verwyder ná sy 22 jaar lank haar hare kou

Dié webwerf kan glo voorspel wanneer jy doodgaan – wil jy weet?

Susan Sarandon ontketen storm met skokaantyging teen Woody Allen