Nhlanhla Majozi (28), wat in Durban gebore en getoë is, dra sy hart op sy mou. Sy folkagtige klanke het die Suid-Afrikaanse luggolwe met mening getref en sy debuutalbum, Fire, het reeds die derde plek op iTunes in Suid-Afrika ingeneem.

Majozi Photoshoot 17

Majozi sluit hom op 16 Junie by Valiant Swart, Francois van Coke, Theuns Jordaan en ander aan by die Emmarentiadam in Johannesburg vir die musiekfees Liefde by die Dam.

Ons het met hom gesels om uit te vind waarna sy bewonderaars kan uitsien:

1. Wat kan ons van jou optrede by Liefde by die Dam verwag?

Dat ek daar sal wees, sal sing en my kitaar sal speel. Ons gaan soveel pret hê. Die konsert gaan fantasties wees. Ek het my liedjies van my nuwe album geoefen, van die ou goed verwerk en ’n klompie interessante effekte bygevoeg. Ek het hard gewerk om dinge interessant te maak vir die konsertgangers; om aan hulle iets anders te bied.

2. Jy gaan die verhoog met van die bekendste kunstenaars in Suid-Afrika deel. Met watter een van hulle wil jy die graagste saamwerk?

Dit sal heerlik wees om ’n duet saam met Francois van Coke te sing, want ons is goeie vriende. Hy is ’n wonderlike mens en is een van my helde. Ek hou van hom as mens en ek hou van sy musiek.

3. Kan ons samewerking verwag?

Ek weet nie. Miskien. Ek hou dit as ’n verrassing.

4. Is jy ’n bietjie skrikkerig om voor so ’n groot groep Afrikaners te sing?

Ja, natuurlik. Maar ek het in Amsterdam op ’n Afrikaanse fees gesing. En dit is, vreemd genoeg, vir my koel. Veral aangesien ek glad nie in Afrikaans sing nie. Maar ek hou daarvan om te sien hoe ander landsburgers my musiek geniet en saamsing.

5. Jou debuutalbum is tans no. 3 op iTunes. Vertel ons hoe die album bymekaar gekom het.

Ek wou graag ’n album uitreik. Ek het die proses werklik geniet en het oor die jare in die ritme gekom van weet hoe om musiek te skryf. Dit is groot pret en ek hou van my werk.

6. Van watter snit op die album hou jy die meeste?

Beslis Our Last Goodbye. Ek is trots op die feit dat ek daardie liedjie kon skryf, selfs al voel dit nie asof ek dit geskryf het nie, maar dat dit van elders af gekom het. Elke keer as ek kyk na die lirieke, en die storie agter die lirieke, staan ek in eerbied.

7. Jy het jouself op 13-jarige ouderdom leer kitaar speel. Hoe het jy dit reggekry?

Ek was gelukkig om ’n klomp vriende te hê wat kitaar speel, dus het hulle my soort van gehelp. Dit was later so lekker, ek het bloot aanhou speel en algaande beter en beter geraak. Ek is nie wonderlik of enigiets nie, maar ek dink jy kom op ’n punt waar jy soveel pret daaruit put, dat dit nie saak maak hoe goed jy is nie. Jy geniet net wat jy doen.

8. Waar kom jou liefde vir breërandhoede vandaan?

Aan die begin van my loopbaan het ek iets nodig gehad wat my sou uitsonder van ander mense. Wanneer ek dus hierdie hoed afhaal, is ek net ’n doodgewone kêrel. Maar met die hoed op my kop, het ek my eie persona.

?????

Kaartjiepryse vir Liefde by die Dam begin by R160.

Klik hier om kaartjies te koop. Volg Liefde by die Dam op Facebook en Instagram, sluit aan by die Facebook-geleentheidblad en twiet saam op Twitter.

Hierdie Jakaranda FM-musiekervaring word aangebied deur Huisgenoot, kykNET en TicketPro.