David Hasselhoff het ’n spoedboete probeer ontduik deur die skuld te pak op sy motor in Knight Rider.

Die 61-jarige akteur het roem verwerf met sy karakter Michael Knight, ’n polisiespeurder in Las Vegas wat misdaad beveg met die hulp van die motor KITT. Hy het die polisie vertel dat die motor homself bestuur het en die blaam moet dra vir die oortreding. Hy was oor die naweek in Londen vir ’n verskyning by die jaarlikse Gumball 3 000-langafstandtydren.

David het erken hy gebruik sy roem om hom uit die moeilikheid te kry, maar dit is die eerste keer dat hy vir sy swaar voet moet opdok.

Hy het gebieg: “Die polisie het my afgetrek omdat ek die spoedgrens oorskry het.

“Wanneer die polisie my gewoonlik tydens die Gumball aftrek, neem ek ’n foto met hulle en hulle laat my gaan. Maar nie vanjaar nie

“Ek het gesê dit is nie my skuld nie; KITT bestuur homself.”

Tydens die Britse tydren se Londense been het meer as ’n halfmiljoen toeskouers die sterre se aankoms kom kyk.

Nog ’n A-lys-ster, Deadmau5 (gebore Joel Zimmerman), het alles misgeloop toe hy by ’n verkeerde pad afdraai.

Die musiekvervaardiger kon toe nie betyds by die resies aansluit nie en is stert tussen die bene terug na die hotel.

Tydens die tydren moet spanne binne sewe dae vyf lande oor twee vastelande oorsteek, van Miami na Ibiza – hulle lê altesaam 4 800 km af.