Die suksesvolle aansoeker, wat R265 300 per jaar sal verdien,  sal verantwoordelik wees vir “skoonmaak, aanbieding en gastesorg van hoë gehalte” in koningin Elizabeth II se ampswoning in Londen.

Die pligte sluit in “die reël van droogskoonmaak, versorging van juweliersware, badwater intap, help aantrek, indien vereis, en die reël van die bediening van tee en ontbytskinkborde”.

Volgens die advertensie op die koninklike huishouding se webtuiste sal die nuwe werknemer in die nabyheid van die koningsgesin werk en moet hulle hy of sy “vertroulikheid kan handhaaf”.

Die posbekleër is verantwoordelik vir die instandhouding van matte, bekleedsel, antieke meubilering, kunswerke, portretrame, spieëls, en silwer- en geelkoper-items.

Aansoekers vir die werk van 40 uur per week moet “nougeset wees met noulettende aandag aan nadere besonderhede” en bereid wees om sowat drie maande per jaar buite Londen te werk.

“Kos en verblyf word voorsien, waarvoor daar ’n salarisaanpassing sal wees,” lui die advertensie.

Die koninklike huishouding se opdrag is die verlening van “uitsonderlike raad en steun” aan koningin Elizabeth sodat sy Brittanje en sy mense kan dien.

Die huishouding het sowat 1 200 werknemers, van tuiniers, kurators en kokke tot sekretaresses en meubelbeplanners.

-Sapa