“Dit het vir die mens wat my kar gesteel het, geen waarde nie. Vir hom is dit net goed wat hy heel waarskynlik gaan weggooi, maar vir ons het dit baie sentimentele waarde,” vertel Amanda Stapelberg aan Huisgenoot.

Sy het onlangs ’n brief aan die gemeenskapskoerant Brakpan Herald geskryf waarin sy ’n beroep doen op die “skelm” om hul Bybels terug te bring.

Amanda se ligblou Toyota Tazz is verlede Saterdag reg voor die gesin se woonstel in Brakpan gesteel.

“Ons was besig om gereed te maak om te ry so halfdrie se kant, toe my man, Johan, by die venster uitkyk en sien die kar is weg,” vertel Amanda.

Johan het gevra waar die motor is.

“Toe sê ek vir hom hy moenie sulke grappe maak nie. Toe ek kyk en sien die kar is weg, het ek dadelik my dogter gebel. Haar verloofde se ma en vriend behoort tot die gemeenskapspolisiëringsforum in Brakpan. Ek het haar gevra hulle moet oor die radio vra mense moet op die uitkyk wees vir die kar.”

Hulle het die saak ook by die polisie aangemeld.

Volgens Amanda parkeer hulle die motor gewoonlik in die woonstelblok se parkeerterrein. Maar omdat hulle pas van haar ouers se huis af gekom het en weer sou ry, het hulle buite in die straat stilgehou.

“Die kar het ’n ratslot wat ons altyd, maar altyd, opgesit het, want dit was die enigste sekuriteit wat die kar het. Ons het ook nie versekering gehad nie.”

Johan en Amanda het die Tazz in 1998 gekoop. En hoewel die gesin hartseer is oor hul motor wat weg is, voel hulle hul Bybels is ook ’n groot verlies.

Die Stapelberg-gesin se Toyota Tazz. Foto: Verskaf

Amanda, Johan en hul dogter, Johanli, se Bybelsakkies was in die kar.

“Ons is gereelde kerkgangers, en gaan omtrent elke week kerk toe. Dis hoekom die sakkies permanent in die kar was. Ons het Bybels in die huis; dis hoekom ons nooit die sakkies uitgehaal het nie,” verduidelik sy.

“Ek het my Bybel in 2003 by die NG Kerk Brakpan-Suid, wat toegemaak het, se predikant gekry. Dit het onder in ’n kamertjie onder die kerkorrel gelê. Die dominee het gesê ek mag dit kry omdat dit ’n 1933/53-vertaling was, en hulle het ’n 1983-vertaling gebruik. Dit was nog baie mooi en het ’n ritssluiter gehad.

“My man het sy grootdruk-Bybel ook by dieselfde predikant gekry toe die kerk toemaak. In daardie stadium was ons kosters by die kerk, maar nie lidmate van hul gemeente nie. 

“My jongste dogter, Johanli (19), het haar Bybel gekry op 1 November 1998, die dag toe sy gedoop is in die Afrikaanse Protestantse Kerk in Benoni. Ons het dit vir haar gebêre tot sy groot genoeg is om dit self op te pas. Sy was baie trots op haar Bybel, en haar doopdatum, naam en Bybelvers met die kerk se embleem en die predikant wat haar gedoop het se naam, was voor in haar Bybel geplak.”

Behalwe die Bybels is hulle ook hul Psalmboeke kwyt.

Dit is net nie dieselfde nie. Dis ’n mens se persoonlike goed en jy sit foto’tjies of spesiale versies of plekhouers in jou Bybel en Psalmboek

“Die Psalmboeke het ons gekoop toe die Afrikaanse Protestantse Kerk in 2005 hul nuwe Psalmboeke in gebruik geneem het. Ek het spesiaal ons name voorin laat skryf om die spesiale geleentheid te vier.”

Amanda sê hulle kan nie bekostig om hul motor te vervang nie en om die Bybels te vervang, gaan hulle ook ’n klomp geld kos.

“Dit is net nie dieselfde nie. Dis ’n mens se persoonlike goed en jy sit foto’tjies of spesiale versies of plekhouers in jou Bybel en Psalmboek.”

’n Woordvoerder van die polisiekantoor in Brakpan het bevestig ’n saak van motordiefstal word ondersoek. Niemand is nog in hegtenis geneem nie.